Нэр дэвшигч Б.Жавхлан: Ард түмнээрээ ялах мөрийн хөтөлбөрийг дэмжээрэй

Я.Болор | Zindaa.mn
2024 оны 06 сарын 11

 

УИХ-ын сонгуулийн 5-р тойрогт нэр дэвшигчид сонгуулийн сурталчилгааны уулзалтаа өнөөдөр Төв аймгийн Батсүмбэр, Баянчандмань, Жаргалант сумдаар үргэлжлүүлж байна. Монгол ардын намаас дэвшүүлсэн “Шинэ сэргэлийн бодлого бүсчилсэн хөгжлийн реформ 2024-2028” мөрийн хөтөлбөрөө Төвийн бүсийн 5-р тойрогт нэр дэвшигчид орон нутгийн  сонгогчиддоо танилцуулж иргэдийн санал бодлыг сонсож байна.

Төвийн бүсийн багийн ахлагч нэр дэвшигч Б. Жавхлан сонгогчиддоо хандан: “Энэ удаагийн сонгууль бол Ард түмэн ялах сонгууль болох учиртай. Өнгөрсөн 4 жил бид хэдийгээр хүнд хэцүү цаг үеийг туулсан ч бодлогын реформыг эхлүүлэж чадсан. Бидний өмнө ямар их алдагдсан боломж байгааг, цаашдаа хөгжлийн ямар том боломж байгааг ард түмэнтэйгээ хамтдаа харж, хяналтаа тогтоож, шударга бустай хамтдаа тэмцэж ялсан ийм он жилүүд байлаа.

Энэ ялалтаа бид баталгаажуулж Шинэ сэргэлтийн бодлогоо үргэлжлүүлэх учиртай. Бид хөгжлийн бодлогодоо Бүсчилсэн хөгжлийг илүү эрчимжүүлж цаашдаа бүс бүрт МЕГА төслүүдийг хэрэгжүүлэх,  Баялагтаа эзэн монголчуудынхаа иргэн бүрийн хуримтлалыг аривжуулж, эрүүл мэнд,боловсрол, орон сууцны асуудлыг шийдэх,  эдийн засгийн өсөлтөө  7-8 хувьд барьж өсөлтийг өрх бүрийн үүдээр оруулах цогц бодлогыг дэвшүүлээд байна.

Мөн Хот хөдөөгийн сэргэлт, бүсчилсэн хөгжлийн реформ хийж, Мянганы зам төслийн үргэлжлэл болгож, аймгийн төвүүдийг хооронд нь, боомтуудтай холбосон таван тойрог автозамын төслийг хэрэгжүүлэх юм. Шинэ хоршоо хөдөлгөөнийг орон даяар өрнүүлэх их бүтээн байгуулалтын ажлыг үе шаттай өрнүүлж эхлэснийг та бүхэн мэдэж байгаа.

Нийслэл Улаанбаатар хотыг бүсчлэн хөгжүүлэх, эмнэлэг, сургууль цэцэрлэг, эрүүл аюулгүй ногоон байгууламж, соёл, спортын үйлчилгээг 20 минут дотор авах шинэ стандартыг тогтоохоос гадна бид Эрчим хүчний либеральчлалын бодлогыг хэрэгжүүлэхээр мөрийн хөтөлбөртөө тусгаад байна. Ийм учраас та бүхнийг Ард түмэн ялах мөрийн хөтөлбөрийг дэмжиж Монгол ардын намд саналаа өгөөрэй гэж уриалж байна” гэлээ.

 

 

Top