ӨГЛӨӨНИЙ МЭНД!

Өнөөдөр 2023.05.15. Билгийн тооллын 26. Монгол эх оронд маань нар 05 цаг 14 минутад мандлаа. 20 цаг 23 минутад жаргана.

Улаанбаатар хотод бороотой. Өдөртөө 6 хэм, шөнөдөө 2 хэм. Та хувцсаа тохируулж өмсөөрэй.

Өнөөдөр Олон улсын гэр бүлийн өдөр. БНСУ-д энэ өдөр Багш нарын баяр, Парагвайд Тусгаар тогтнолын өдөр, АНУ-д Энхийг сахиулагчдын дурсгалын өдөр, Словенид Зэвсэгт хүчний өдөр тохиож байна.

Өнөөдөр Оросын нэрт балетчин, ЗХУ-ын Ардын жүжигчин Надежда Павлова, Чехийн Ерөнхий сайд асан Мирек Тополанек, Их Британийн теннисчин, олимпын аварга Энди Маррей, Туркийн сагсан бөмбөгч Эрсан Ильясова, Францын хөлбөмбөгч Усмане Дембеле, Оросын дуучин Слава зэрэг алдартан мэндэлжээ.

Энэ өдөр Монгол Улсын түүхэнд болсон онцлох үйл явдлууд:

1936 оны энэ өдөр Улсын хэвлэлийн хороог өргөтгөж, Улсын хэвлэлийн хэрэг эрхлэх төв болгов.

1990 оны энэ өдөр Монголын Улаан загалмайн банк байгуулах шийдвэр, дүрмийн төслийг Улсын банкны ерөнхий хорооны гишүүдийн хурлаар хэлэлцүүлжээ. Хурлаар олон нийтийн нэг байгууллагын хөрөнгөөр банк байгуулахыг түдгэлзэв. Харин хувь нийлүүлэгчдээ өргөтгөх чиглэл өгсөний дагуу Монголын үйлдвэр, үйлчилгээний хоршоодын холбоо, Монголын үйлдвэрчний эвлэл зэрэг байгууллагууд хувь нийлүүлэгчдээр оролцож, “Монгол хоршоо” банк байгуулахаар шийдэв. Энэ нь Монголд арилжааны банк байгуулах анхны гараа, шинэ зам гаргасан гэж үздэг.

2000 оны энэ өдөр Батлан хамгаалахын сайдын тушаалаар “Батлан хамгаалах салбарт мэргэжлийн боловсон хүчин бэлтгэх бодлого, үндсэн чиглэл”-ийг батлав.

2013 оны энэ өдөр “Чингис хаан” гэж нэрлэсэн Монгол Улсын анхны “Boing 767 300ER” онгоц АНУ-аас шууд нислэг үйлдэж, Улаанбаатарт газарджээ.

Өнөөдөр дэлхий дахинд болсон онцлох үйл явдлууд:

1811 оны энэ өдөр Парагвай Испаниас тусгаар тогтнож байгааг зарлав.

1851 оны энэ өдөр Нью-Йорк болон Их нууруудыг холбосон анхны төмөр замыг тавьжээ.

1905 оны энэ өдөр Лас-Вегас хот үүсгэн байгуулагдав.

1918 оны энэ өдөр Финландад иргэний дайн дуусжээ.

1940 оны энэ өдөр АНУ-д нелонон оймс худалдаанд гарч эхэлсэн байна.

Энэ өдөр үс засуулвал Жаргал үргэлжид ирнэ.

Тухайн өдөр үхэр, могой жилтнээ аливаа үйлийг хийхэд эерэг сайн. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, гарагийг тахих, хагалгаа хийлгэх, буг дарах, газрын ам бооход сайн. Харин улаа гаргах, хиншүү хярвас гаргах, мод суулгах, нарийн зөвлөгөөн хийх, байшингийн суурь тавих, угаал үйлдэхэд муу. Өдрийн сайн цаг нь хулгана, бар, туулай, морь, хонь, тахиа.

Хол газар явах бол баруун хойш мөрөө гаргаарай.

Өнөөдрийн ажилд тань амжилт хүсье.