Н.Учрал: Өглөөний нарыг үзэх мөч тохиосонд сэтгэл өндөр байна

УИХ-ын гишүүн Н.Учралын бие өнгөрсөн оны сүүлээр өвдөж, гадаадад удаан хугацаанд эмчилгээ хийлгээд ирсэн билээ. Түүний биеийн байдал өдрөөс өдөрт сайжирч байгаа тул энэ долоо хоногоос албаны зарим цахим хуралд оролцож эхлээд байгаа юм.

Н.Учрал гишүүн өнөөдөр “Карантин-14” нэвтрүүлэгт онлайнаар оролцож, ард түмэнд талархал илэрхийлэн, сэтгэгдлээ хуваалцсаныг уншигч танд мөн хүргэж байна. 

УИХ-ЫН ГИШҮҮН Н.УЧРАЛ:

-Өглөөний нарыг Монгол ахан дүүс та бүхэнтэй хамтдаа үзэж, амьдрах сайхныг мэдэрч, та бүхэндээ мэндчилгээ дэвшүүлж суух мөч тохиож байгаад сэтгэл өндөр байна. Миний хувьд өнгөрсөн сарууд их хүнд байсан. Хүн гэдэг амьдрахын сайхныг амьдарч байхдаа мэддэггүй юм байна. Хүн бол өвчин зовлонгоос өөр зүйлд сөхөрдөггүй юм байна гэдгийг ойлголоо. Бие биедээ хайраа түгээж, бие биедээ хүндэтгэлтэй хандаж, бусдад хайрыг түгээх, бусдаас хайр мэдрэхийн жаргалыг ойлгож байгаа нь хамгийн том аз жаргал юм. Тиймээс өнөөдөр дэлхий нийтэд аюулын харанга дэгдээд байгаа энэ цаг үеийг бид хамтын хүчээр даван туулна. Иргэд маань хэд хоног хөл хорио тогтоох, цагдаад шалгуулах гэх мэт жижиг сажиг зүйлд бухимддаг. Хүн амьд явах нь хамгийн том аз жаргал шүү. Эдийн засаг хямарч байна гэж бухимдаж байгаа ч ямар ч мөнгөөр худалдаж авч чадахгүй зүйл бол эрүүл мэнд. 

Надаас хүмүүс “Ээж, аав, ойр дотны хүмүүстээ ямар бэлэг өгвөл тэр хүн баярлах бол” гэж асуудаг байсан. Хамгийн том бэлэг бол сэтгэл санааг нь амар тайван байлгахад оршдог юм байна. Би аав, ээж, хань, үр хүүхдийнхээ сэтгэлийг зовоож байгаадаа маш их шаналж байсан. Миний цаашдын амьдралдаа баримтлах зарчим бол хайртай хүмүүсийнхээ сэтгэлийг амар амгалан байлгаж, энх тунх, элэг бүтэн амьдрахын төлөө хичээх. Хүн амьдралд дандаа сэтгэгдэл бүтээж амьдардаг. Үнэтэй баялгийг аваад үхэж чадахгүйгээс хойш түмэн олныхоо хайр талархлыг хүлээсэн сайхан амьдралаар амьдрах ёстой. Хайраа түгээж, хайр хүндэтгэлийн сайхныг ойлгож амьдраасай гэж хүсэж байна.

Өнөөдөр та бүхэнтэй мэндчилэх энэ сайхан боломжийг олгосон эрүүл мэндийн салбарын ажилчид, Улсын II төв эмнэлгийн хамт олон болон тус эмнэлгийн даргаар ажиллаж байсан, одоо Эрүүл мэндийн сайдаар томилогдоод буй С.Энхболд, миний төлөө сэтгэл гаргасан эмч, сувилагч нартаа баярлалаа. Та бүхний миний төлөө гаргасан тэр их сэтгэлийг хариулахын тулд хичээж ажиллах болно. Миний төлөө сүүн цацлаа өргөж байсан олон сайхан ээжийн сэтгэлийг эрүүл саруул байж, эхлүүлсэн олон ажлаа дуусгаж, эх орондоо элэг бүтэн сайхан амьдрахын төлөөх үйлсээр хариулж, гал цогтой үргэлжлүүлэх болно. Та бүхэндээ маш их баярлалаа.