М.Билэгт: Зээл төлөх зовлонг мэддэг учраас 300 түрээслэгчийнхээ төлбөрийг чөлөөлсөн

Коронавирусний халдвар дотоодод гарсан өдөр буюу арваннэгдүгээр сарын 11-ээс хойш монголчууд хоёр сар хөл хорионд байлаа. Хөл хорио нь нэг талдаа халдварын тархалтыг бууруулах ч нөгөө талдаа эдийн засгийн өндөр эрсдэл дагуулж байгаа.

Тэгвэл үүссэн нөхцөл байдалтай холбоотойгоор УИХ-ын гишүүн асан М.Билэгт өөрийн эзэмшлийн “Ачлал” их дэлгүүрийн түрээсийг 100 хувь чөлөөлнө гэдгээ мэдэгджээ.

Энэ талаар түүний байр суурийг тодрууллаа.

Тэрбээр “Хамгийн гол нь түрээслэгчид хувиараа хөдөлмөр эрхлэгчид байдаг. Жижиг, дунд бизнес эрхлэгчид гэдэг ангилалд ч орохгүй. Жижиг, дунд бизнес эрхлэгч гэдэг ангилалд бол ес ба түүнээс дээш ажилтан цалинжуулж байгаа бизнес эрхлэгчийг хэлнэ. Гэтэл хувиараа хөдөлмөр эрхлэгчид 4-5 хүн цалинжуулаад, дээр нь зээл болон түрээсийн төлбөрөө хугацаанд нь төлөхийн тулд ажилчин шоргоолж шиг л ажиллаж байна. Худалдаачид улирлын онцлогт тохируулж бараагаа авчирдаг. Энэ жил өвлийн хувцас зарагдсангүй. Одоо зээл, зээлийн хүү гэх мэт асуудал өрөн дээр нь нэмэгдээд явж байна. Наймаачдын ашиг бол зээл, түрээсээ төлөөд үлдсэн бараа нь байдаг. Яг энэ амьдралыг би өөрөө туулсан. Тиймээс би 300 гаруй худалдаа эрхлэгчийнхээ түрээсийн төлбөрийг арваннэгдүгээр сарын 11-нээс эхлээд 100 хувь чөлөөлж байна” гэсэн хариулт өглөө.