Энэ долоо хоногт 80 мянган өрхөд угаар мэдрэгч ТАРААНА

Энэ долоо хоногт гэр хорооллын 80 мянган өрхөд угаар мэдрэгч тараах юм байна. Нийслэлийн Мэргэжлийн хяналтын газрын дэд дарга С.Даваасүрэн, Цаг уур, орчны шинжилгээний газрын Орчны шинжилгээний хэлтсийн дарга Ж.Батбаяр нар өнгөрсөн долоо хоногт мэдээлэл хийхдээ энэ сарын 10-ны дотор 220 мянган айл өрхөд угаар мэдрэгч суурилуулахаар ажиллаж байгаа гэж байсан билээ.

Засгийн газрын 62 дугаар тогтоолын хэрэгжилтийн хүрээнд түүхий нүүрсний хэрэглээг халснаар агаар орчны чанарын үзүүлэлт сайжирсан гэх мэдээллийг   Ж.Батбаяр өгч байсан. Тэрбээр “Урд жилүүдэд агаарын бохирдлын хэмжээ, бохирдуулагчийн агууламжийн хэмжээ стандартаас их байна гэдэг мэдээллийг өгдөг байсан. Энэ жилийн хувьд агаарын бохирдол бус агаарын чанар, хүний эрүүл мэндэд нөлөөлж буй байдлын талаар дүн шинжилгээ хийж мэдээллэж байгаа. Өнгөрсөн хоёр өдрүүдэд агаарын чанарын индекс бага бохирдолтой байна гэдэг үзүүлэлттэй байлаа” гэсэн юм.