М.Зоригт: Украинд байгаа оюутнуудаа аваад ирэхэд би бэлэн байна

ОХУ Украины эсрэг цэргийн ажиллагаа эхлүүлсэн. Үүнээс үүдэж Украин улсад суралцаж буй Монгол оюутнуудын нөхцөл байдал хүндэрч, эх орондоо ирэх хүсэлт гаргасан ч тус улс ямар ч нислэг хүлээж авах боломжгүй болоод байгаа билээ. Гадаад харилцааны яамнаас өгч буй хамгийн сүүлийн мэдээллээр энгийн иргэн, тамирчин, оюутан гээд 24 Монгол иргэнийг Польш улс руу оруулаад байна. Эдгээрээс гурав нь өнөөдөр /2022.02.27/ өнөөдөр эх орондоо ирэх бол үлдсэн иргэдээ хамгийн ойрын нислэгээр татан авахаар ажиллаж байгаа аж. Одоо Украин улсад 20 орчим оюутан байна. 

Дээрх нөхцөл байдалтай уялдуулан улстөрч М.Зоригт Украинд өөрийн биеэр очоод, автобус түрээслэн оюутнуудаа авчирэх санал гаргаад байгаа билээ. Ийм боломж байгаа эсэхийг түүнтэй холбогдож тодрууллаа. 

-Украинд байгаа оюутнуудаа авч ирэх саналыг та гаргасан байна. Тэднийг авчирэх ямар боломж байна вэ?

-“Оюутнуудаа ав, дайн эхлэх гээд байна” гэж би нэг биш удаа нийгмийн сүлжээгээр дамжуулж бичсэн. Дайн эхэллээ, хүүхдүүд ч сандарлааа. Улсыг хараад байхад дорвитой юм болохгүй байна. Уг нь Польш улсын хилээс хэдхэн цаг давхиад очих газар л даа. Миний санаа бол Польшоор дамжиж Киев руу ороод хүүхдүүдээ аваад ирж болмоор санагдаад байгаа юм. Дайны байдлыг ажиглахад цэрэг цэргээ л буудаж байгаа болохоос энгийн иргэн рүү дайрахгүй байна. Тэгээд ч тээвэрлэж яваа автобусныхаа гадна Монгол оюутнууд буцаж явна гэдгийг томоор бичээд хөдлөхөд хэн ч буудахгүй гэж найдаж байна. Намайг яваад ир гэвэл би дуртай явна.

Хоёрдугаарт, засаг төрийнхөн санаа аваасай гэж бодсондоо бичиж байгаа юм. Польш улсад манай Элчин сайдын яам бий. Элчингийн хоёр жолоочдоо автобус өгөөд явуулахад ямар ч асуудалгүй шүү дээ.

-Аюулгүй байдал талаасаа эрсдэлтэй юм биш үү?

-Үгүй.  Оросын танкны хажуугаар Украины иргэд явж байна. ОХУ, Украин хоёр улс жирийн иргэн рүү  халдахгүй гэсэн зарчим барьж байгаа. Иргэд нь хотоос гарах, явах нь чөлөөтэй байгаа.

-Тэднийг авчирэх саналаа албан ёсоор гаргав уу?

-Миний жиргээг Гадаад яамныхан байтугай бүгд үздэг. Намайг яваад ир гэвэл би бэлэн байна. Би бол Орос нь ч таарсан, Украин нь ч таарсан ярина, ойлголцоно. Зөвхөн өдрийн цагаар зорчих хөдөлгөөнд оролцоод, автобусныхаа гадна “Монгол оюутнууд буцаж байна” гэж бичээд явах юм бол хэн ч буудахгүй шүү дээ. Оюутнуудаа Польшт аваад ирсэн бол Москва руу давхиж болно. Эсвэл Германаар дамжаад ирж болно. Польш Истанбулын нислэгт суугаад Турк улсаар дамжаад ирж болно. Тэднийг авчирэх боломж олон байна.