ӨГЛӨӨНИЙ МЭНД!
Өнөөдөр 2025.10.07. Энэ оны 280 дахь өдөр бөгөөд он дуусахад 85 хоног үлдэж байна. Монгол эх оронд маань нар 06 цаг 58 минутад мандаж, 18 цаг 22 минутад жаргана.
Улаанбаатарт багавтар үүлтэй. Өдөртөө 3 хэм дулаан, шөнөдөө 6 хэм хүйтэн байна. Та хувцсаа тохируулж өмсөөд гараарай.
Өнөөдөр Дэлхийн каратегийн өдөр тохиож байна. Лаост Багш нарын өдөр, Иранд Тосгод, овог аймгуудын өдөр, АНУ-д ЛЕД гэрлийн өдөр, Пуэрто Рикод Сайн харилцааны өдөр, Киргизэд Иргэний агаарын тээврийн өдрийг тэмдэглэж байна.
Энэ өдөр Их Британийн уран гулгагч, олимпын аварга Жейн Торвилл, Америкийн жүжигчин Дилан Бейкер, дуучин Тони Брэкстон, Японы дуучин, жүжигчин Тома Икүта, Америкийн уран гулгагч, тивийн аварга Жан-Люк Бейкер зэрэг алдартан төржээ.
Энэ өдөр Монгол Улсын түүхэнд болсон онцлох үйл явдлууд:
1937 оны энэ өдөр Улаанбаатар хот, Засгийн газрын хамтарсан хурлаар Улаанбаатар хотын орлогч дарга Д.Ламжав, Нарийн бичгийн дарга Ширнэн нарыг өөрчилж, Д.Лосолыг хотын орлогч дарга, Дамдинсүрэнг нарийн бичгийн даргаар томилжээ. Д.Ламжавыг “П.Гэндэн, Г.Дэмидийн эсэргүү бүлгэмийн гишүүн” гэсэн хэрэгт хилсээр шийтгэжээ. Түүнийг 1962 онд цагаатгасан байна.
1967 оны энэ өдөр Монголын зурагт, радиогийн хүүхдэд зориулсан анхны нэвтрүүлэг “Бидний шинэ танил” нэртэйгээр цацагджээ.
2015 оны энэ өдөр Богдхан уулын тэнгэрийг тайх төрийн тахилгын ёслол болжээ.
Энэ өдөр дэлхий дахинд болсон онцлох үйл явдлууд:
1966 оны энэ өдөр ЗСБНХУ-аас бүх хятад оюутныг гаргажээ.
1971 оны энэ өдөр Нью-Йоркт гол дүрд нь Жин Хэкмен тоглосон “The French Connection” киноны нээлт болов. Уг кино дөрвөн Оскар хүртсэн билээ.
1988 оны энэ өдөр Ригад 1940 оноос хойш анх удаагаа Латвийн төрийн далбааг өлгөжээ.
1999 оны энэ өдөр Их Британийн эрдэмтэд нарны аймгийн хамгийн хол, хамгийн том 10 дахь гараг оршин байж болох талаар мэдэгдэв.
2001 оны энэ өдөр АНУ Афганистанд цэргийн ажиллагаагаа эхэлжээ.
2004 оны энэ өдөр Камбожийн хаан Нородом Сианук эрүүл мэндийн улмаас хаан ширээнээсээ буужээ. Долоо хоногийн дараа түүний бага хүү хаан ширээнд залрав.
2023 оны энэ өдөр Хамас хөдөлгөөнийхөн Израил руу халдан оров. Газын зурваст дайн эхлэв.
Өнөөдөр үс засуулбал өлзийтэй сайн
Өнөөдрийн ажилд тань амжилт хүсье!
Холбоотой мэдээ
Сэтгэгдэл ( 0 )