Өнөөдөр Монголын зургаан бөх Дэлхийн дэвжээнээ барилдана

Хорватын Загреб хотноо Дэлхийн дэвжээн дээрх барилдаануудын тоо цөөрч, Монголын баг тамирчдын хувьд хувь дүнгээр сүүлчийн зургаан бөх өнөөдөр барилдах болно.

Эмэгтэйчүүдийн 50 кг-ын жинд Б.Мөнхнар, 65 кг-ын жинд Т.Энхжин нар хүрэл медалийн төлөө шалгаран үлдээд байгаа.

Үүнээс гадна өнөөдөр дөрвөн бөхийн жингийн барилдаан эхэлнэ. Эмэгтэйчүүдийн 53 кг-ын жинд 29 настай Ц.Намуунцэцэг Румын улсын бөх Беатрис Ференттэй барилдана.

62 кг-ын жинд барилдах Дэлхийн аварга, 31 настай П.Орхонтой Белорусь, Румыны бөхийн хэн ялсан нь,  68 кг-ын жинд Дэлхийн аваргын мөнгөн медаль Э.Дэлгэрмаатай Швед, Хятадын бөхийн хэн ялсан нь тус тус барилдана. 72 кг-ын жинд 33 настай З.Болортунгалагтай Энэтхэгийн Жиоти Бервал сугалаа таарчээ.

Одоогоор Монголын баг тамирчид нэг мөнгө /Т.Тулга/, нэг хүрэл /Т.Алтжин/ медаль хүртээд байна.