Олимпын аварга Сидаковын хурим дээрээсээ хөөж явуулсан эхнэр нь чимээгүй амьдарсаар...

Нөгөөдөр буюу энэ сарын 13-нд Хорватын Загреб хотноо чөлөөт бөхийн ДАШТ эхэлнэ. Энэ тэмцээнд ОХУ-ын баг тамирчдын тоонд Олимпын аварга, Дэлхийн гурван удаагийн аварга Заурбек Сидаков багтжээ.

ДАШТ-ий өмнө Сидаковын таван жилийн өмнөх хуримын талаар сошиал орчин сануулж байна. Тухайн үед 24 настай Сидаков өөрөөсөө нэг эгч Мадина Плиеватай нутгийнхаа заншлын дагуу хуримаа нижгэр хийсэн юм. Гэвч хурим дээрээс шинэхэн эхнэрээ үсдэж, хөөж явуулснаар төгссөн.

Сидаков бол бөхийн өлгий нутаг Умард Осетийн залуу. 2020 оны дөрөвдүгээр сард нохойгоо салхилуулж яваа нэгэн үзэсгэлэнт бүсгүйтэй танилцаад, хэдхэн сарын дараагаар хуримаа хийсэн юм. Тамирчдад зав чөлөө бага гардаг тул олдсон цаг хугацааг ашиглаад хуримаа хийхээр яарсан нь буруу болжээ.

Алдартай тамирчин Владикавказад хуримдаа 500 гаруй зочин урихад Дагестан, Чеченийн бөхчүүд хүртэл ирж оролцжээ. Кавказынхны ёсоор хурим дээр ирсэн зочид хэд хоног найрлахдаа эрчүүдээрээ тусгайлан уулзаж, бүжиглэдэг юм байна. Энэ бол хуримын оргил үе. Яг тэр үед Сидаков болон түүний аав ээж, мөн зарим зочдын гар утсанд эхнэр Мадина Плиевагийнх хоёр бичлэг ирсэн байна. Бичлэг дээр Плиева нүцгэн байх бөгөөд садар самуун шинжийг агуулж байжээ.

Тэр бичлэгийг үзмэгцээ Заурбек Сидаков эхнэрээ шууд үсдэж аваад, хуримаасаа хөөн явуулсан байна. Үүнийг харсан хадам аавынх нь зүрх өвдөж, бие нь мууджээ. Мадина Плиева ч маш хүнд цочирдолд орсон учир амиа хорлохыг завдаж, тэр даруй эмнэлэгт яаралтай хүргэсэн байна.

Харин уулынхан нь Сидаковыг тайвшруулж, буруу зөрүү юм хийхээс хамгаалжээ.

“Энэ бүхнийг хийсэн хүн Осетийн хуримын ёс заншлыг сайн мэддэг байгаа юм. Хурим яг хавтгайрч, олон хүн цугласан үеийг тооцож мэдсэн. Хэрвээ хурим яг оргил үедээ биш байсан бол арай өөрөөр хүлээн авч болох байсан. Гэтэл олны нүдний өмнө гэнэт тийм зүйл гараад ирэхээр эр хүний хувьд нэр төрөө хамгаалах шаардлага тулгарсан. Осетийн алдартай бөх “явдалтай хүүхэн”-тэй суух гэж үү? Хэрхэвч тэгэхгүй! Аавынх нь бие муудсан нь ч ойлгомжтой. Залуус бол яахав, аяндаа эргээд сэргэчихнэ. Харин тэр хөгшин л хэцүү байна” гэж хуримын зочин хижээл насны нэгэн өгүүлжээ.

Энэ явдал Сидаковын спортын замнал, амжилтад сөргөөр нөлөөлөхвий гэсэн болгоомжлол мэдээж бий болсон. “Хэдийгээр яг хурим дээр нь бичлэг ирсэн ч гэлээ өөрөөр шийдэх боломж байсан юм бишүү? гэсэн асуултад нэрээ нууцлахыг хүссэн хуримын нэгэн зочин “Осетод хөвгүүдийг нөхөр болгох гэж биш эр хүн болгох гэж хүмүүжүүлдэг юм. Тиймээс эр хүний нэр төрөө хамгаалах шаардлага нэн тэргүүнд гарч ирсэн” гэжээ.

“Эхнэр болж буй бүсгүй нь 25 настай шүү дээ. Онгон гэж бодно гэж баймааргүй юм?” гэхэд “Мадина өөрийнхөө өнгөрсөн “түүх”-ийн талаар илүү дэлгэрэнгүй ярьж өгсөн бол Заур тэгж хүлээж авахгүй. Хэдхэн сарын өмнө танилцсан болохоор бие биенийгээ илүү сайн таньж, мэдээгүй.

Нэгэн этгээд энэ бүхнийг нарийн тооцож, хуримаар нь чадах гэсэндээ хүрч чадлаа. Хэрвээ Заурт эхнэрийнх нь талаар анхааруулах гэсэн бол хуримын өмнө юмуу ядаж хуримын эхэнд тэр бичлэгийг явуулж болох байсан. Тэгэхээр хуримыг нь сүйтгээд зогсохгүй мөн чухал тэмцээнийх нь өмнө сэтгэл санааг нь тогтворгүй болгох гэсэн байх. Тийм бичлэг авсан хүн эхнэртээ хууртсан мэт бодно. Даруухан, боловсон бүсгүй гэнэт л биеэ үнэлэгч шиг санагдана шүү дээ. Заур өөрийг нь тэнэг амьтан гэж бодлоо гэж уурласандаа л тэгсэн.

Хэрвээ эхнэр нь тийм “түүх”-тэйг мэдсэн бол гэрлэхгүй байсан. Гэхдээ Мадина бол биеэ үнэлэгч биш. Чинээлэг айлын охин шүү дээ. Мөнгөний төлөө биеэ үнэлж явах шаардлага байхгүй. Заур ч үүнийг мэдэхийн дээдээр мэдэж байгаа. Харин Мадина өмнө нь сүрхий хайр дурлалын түүхтэй байсан бололтой. Эхнэртэй эртэй учиртай байсан юмуу даа. Тиймээс энд эмэгтэй хүний гар оролцсон байхыг үгүйсгэхгүй. Хардалтаас болсон байх талтай” хэмээн хуримын нэрээ нууцалсан зочин хэвлэлд ярьж байлаа.

Мадина Плиева тэр гутамшигтай явдлын талаар огт тайлбар хийгээгүй. Харин сошиал дахь бүх хаягаа устгаад, ор сураггүй болсон юм. Мадина Москва руу, харин Сидаков уул руу гарчээ. Хэсэг хугацааны дараа тэд гэр бүлээ цуцлуулсан.

Мадинагийн цочирдол, сэтгэлийн шарх аяндаа багасаж, аяллын зураг зэргийг олон нийтийн сүлжээнд оруулах болсон ч гунигтай мэргэн үгс дагуулж, нойрондоо муу болсноо дурдаж, өөртөө сэтгэл хангалуун байж чадахаа больсноо нуугаагүй гэнэ. Хожим Москвагаас Ставрополь руу очсон ч удалгүй дахиад сошиал хаягуудаа хааж, устгажээ. Жилийн өмнө аюулгүй, амгалан байгаагаа дуулгасан ч нэмж илүү тодорхой ярихаас зайлсхийсэн юм.

Харин Сидаков тэр дуулиантай хуримаас хойш Токиогийн олимпын наадамд түрүүлсэн.