165 сая ам.долларын шинэ гэрээт Дончич: Онцгой зүйл бүтээхэд бэлэн

Лука Дончич “Лос Анжелес Лейкерс”-тэй гэрээгээ 2028 он хүртэл сунгаж, гурван жилийн хугацаанд 165 сая ам.доллар дээр тогтлоо. Тэрбээр багтаа Смарт болон Эйтоныг авчрахад нөлөө үзүүлж, тусалсан бөгөөд ирээдүйд онцгой зүйл бүтээх багийг босгоно гэж амлажээ.
 

Ийнхүү гурван жилийн гэрээ хийснээр 26 настай Дончич ирэх зун чөлөөт агент болохооргүй боллоо. Мөн 2028 онд таван жилийн 417 сая ам.долларын гэрээ байгуулах боломж бүрдэж байна.

“Энэ бол зөвхөн эхлэл. Багтайгаа онцгой зүйл бүтээхэд би бэлэн. Тэсэн ядан хүлээж ч байна. Манай багт аваргын төлөө өрсөлдөх шаардлагатай бүхэн бий. Тоглолт бүрт хожихын төлөө зүтгэх болно. Шинэ хүчирхэг тоглогчид ч ирлээ. Тиймээс бид эцсээ хүртэл явах болно” хэмээн Дончич мэдэгдсэн юм.
 

Түүнийг өнгөрсөн хоёрдугаар сард “Даллас”-аас дуулиантай солилцоогоор авчирснаасаа хойш Жини Басс болон Роб Пелинка нар маш ойр харилцаж, бие биенээ сайн ойлголцжээ.

“Одоогоос яг хагас жилийн өмнө бид Лука Дончичийг солилцоогоор авчирч байлаа. Тэгвэл өнөөдөр Лука Дончич өөрөө “Лейкерс”-ийг сонгож байна. Энэ бол манай багийн түүхэнд үнэхээр аугаа үйл явдал. Хамтран ажиллаж буйд нь хязгааргүй их талархаж байна. Дэлхийн хамгийн шилдэг клубтэй ертөнцийн хамгийн шилдэг залуу сагсанбөмбөгч удаан хугацааны гэрээ байгууллаа. Өрсөлдөгчдөө хамгийн эвгүй, мөн үргэлж ялалтын төлөө давшигч бол Лука Дончич. Лос Анжелест ялалт байгуулах сагсанбөмбөгийг эргүүлэн авчирч чадна гэдэгт итгэж байна” хэмээн Пелинка өгүүлэв.
 

Хэдийгээр өнгөрсөн улиралд Дончич ердөө 50 тоглолтод гарсан ч багийнхаа онооны болон самбар, дамжуулалт, бөмбөг таслалт, гурвын шидэлтийн лидер байж чадсан.

Талбайн гадна ч нөлөө ихтэй байгаа. Маркус Смартыг авчрахад тус болж, хуучны найз Деандре Эйтоныг авчрахад ч нөлөөлсөн.
 

Мөн түүний биеийн жин, формын тухай яриа их гардаг. Тэгвэл жингээ илт хасаж, формдоо бүрэн орохоор тэмүүлж байгаа нь илт байгаа. Ийнхүү шинэ гэрээ хийсэн нь “Лейкерс”-т Дончичийн гэх шинэ эрин ирсний тод илэрхийлэл боллоо.