Монголын эмэгтэйчүүдийн шигшээ дахин амжилтын түүх бүтээлээ

Азийн цомын В дивизионд Монголын эмэгтэйчүүдийн шигшээ баг дөрөвдүгээр байр эзэллээ. Өчигдөр гуравдугаар байрны төлөөх тоглолтод Тайландад 73:78-аар хожигдлоо.

Гэвч манай шигшээ багийнхан түүхэндээ байгаагүй амжилтын шинэ хуудсыг нээж чадлаа. Хэсэгтээ эхлээд Тайландыг 81:74-өөр хожоод, дараа нь Иранд 89:55-аар хол хожигдсон ч Күүкийн арлуудыг 82:55-аар буулган авснаар хэсгээсээ шалгарсан.

Ингээд шөвгийн дөрвийн төлөөх тоглолтод Казахстаныг 78:70-аар хожоод, шөвгийн дөрөвт Хятадын Тайваньд 82:92-оор хожигдож, улмаар гуравдугаар байрны төлөө тоглох болсон юм.

Монголын эмэгтэйчүүдийн шигшээ Азийн цомын хасагдах шатанд анх удаагаа хожсон нь амжилтын шинэ түүх боллоо.

Энэ тэмцээнд Монголын шигшээд Б.Ариунцэцэг, Б.Өнөрзаяа, М.Булбул, Б.Цацрал, Ц.Болорцэцэг, Т.Үлэмж, Н.Нандинхүсэл, О.Хулан, Б.Болор-Эрдэнэ, У.Содцэцэг, Бат.Болор-Эрдэнэ, Э.Нарангоо нарын зэрэг тамирчидтай, ахлах дасгалжуулагч Гарсиа Альварес, туслах дасгалжуулагчаар Б.Баярцогт, Б.Баярбат нар оролцлоо.

Манай багийн гол цөм нь 3х3-аар Дэлхийн мөнгөн медаль хүртсэн О.Хулан, Б.Ариунцэцэг, Н.Нандинхүсэл нар байлаа. Шигшээ багаас хамгийн үр ашигтай тоглогчийн үзүүлэлтийг Б.Ариунцэцэг 16 оноотойгоор тэргүүлсэн бол О.Хулан дунджаар 17 оноо авсан үзүүлэлтээр тус тус тэргүүлжээ. Мөн Б.Ариунцэцэг дунджаар 7.3 самбар, Н.Нандинхүсэл дунджаар 4.7 дамжуулалтаар багаа манлайллаа.

Энэ тэмцээний финалд Хятадын Тайвань 74:55-аар Ираныг хожсоноор А дивизионд дэвших эрхээ авлаа. Хятадын Тайваньтай оноо хамгийн ойрхон буюу 10 онооны зөрүүтэй тоглолтоо дуусгасан нь Монголын шигшээ байлаа.

Энэ тэмцээний явцад чансаа дээгүүр Тайланд, Казахстаны шигшээг хожсон тул Дэлхийн чансаанд дээшлэх нь ойлгомжтой.