Трамп трансжендер тамирчныг тэмцээнд оруулбал санхүүжилтыг бүрэн зогсооно гэв

АНУ-ын Ерөнхийлөгч Доналд Трамп байгалиасаа эрэгтэй төрсөн трансжендер тамирчдыг эмэгтэйчүүдийн уралдаан тэмцээнд оролцуулахгүй гэсэн байр сууриа хатуу баримталсан хэвээр байна.

Энэ долоо хоногийн эхээр Калифорнийн Журупа Вэллигийн дунд сургуулийн эмэгтэйчүүдийн уртын харайлт ба гурвын харайлт мөн өндрийн харайлтын төрөлд Э.Б.Эрнандес хэмээх трансжендер тамирчин оролцож, түрүүлжээ. Өрсөлдөгчдөөсөө толгой илүү амжилт үзүүлэн түрүүлсэн тэрбээр энэ долоо хоногийн амралтын өдөр болох мужийн АШТ-д оролцох эрхээ авсан юм байна.
 

Үүнийг олж сонссон Доналд Трамп ихэд бухимдан, Калифорни мужийн амбан захирагч Гэвин Ньюсомыг шүүмжлээд тус мужид төсөвлөсөн спортын уралдаан тэмцээний санжүүжилтыг зогсооно гэж мэдэгдлээ.

“Зүүний радикал ардчилсан үзэлтэн Гэвин Ньюсомын удирдлага доорх Калифорни мужид эрчүүдийг эмэгтэйчүүдийн спортын тэмцээнд оролцохыг зөвшөөрсөн хэвээр байна.
 

Энэ долоо хоногт нэгэн эрэгтэй тамирчин эмэгтэйчүүдийн томоохон тэмцээнд оролцож, байж болох бүхий л уралдаанд түрүүлжээ. Одоо ирэх амралтын өдөр мужийн АШТ-д оролцох эрх авсан гэнэ.

Тэр тамирчин эрэгтэй байхдаа дундаж тамирчдаас доогуур амжилттай байлаа. Харин эмэгтэйчүүдтэй өрсөлдмөгцөө ялагдашгүй болжээ. Энэ бол охид, эмэгтэйчүүдийн өрсөлдөөнийг үндсээр нь үгүй хийсэн, шударга бус явдал.
 

Тиймээс тус мужийн спортын ажиллагаанд зориулах санхүүжилтыг бүрэн зогсоох болно. Ерөнхийлөгчийн зарлигийг биелүүлтэл санжүүжилт өгөхгүй. Өнөөдөр би мужийн амбан захирагчтай өөрөө ярьж, юу хүсээд байгааг нь асууна. Үүний зэрэгцээ трансжендер тамирчныг эмэгтэйчүүдийн тэмцээнд оролцуулахгүй байхыг орон нутгийн эрх мэдэлтнүүдэд тушааж байна. Ийм явдал байж болохгүй!!!” хэмээн Доналд Трамп мэдэгджээ.