Уимблдоныг үзэхээр ирэхгүй байхыг зөвлөжээ

Талбайн теннисийн “Их дуулга”-ын цувралуудын нэг Уимблдон албан ёсоор нээлтээ хийж байна. Гэхдээ өнөөдөр буюу даваа гаригт болох тоглолтуудыг үзэхээр Уимблдонд ирэхгүй байхыг зохион байгуулагчид зөвлөжээ.

Учир нь олон мянган хүн дугаарлаж зогсоо учир 42 мянган үзэгчийн багтаамжтай тэрхэн хэсэг талбайд багтах боломжгүй болжээ. Мөн өнөөдөр өдөртөө 34 хэмийн халуун байх учир сүүдэрт хоргодох газаргүй шахам цэцэрлэгт хүрээлэн, үзэгчдийн суудалд хүмүүсийн бие муудах аюултайг санууллаа.

Уимблдоны эхний өдөр түүхэндээ хэзээ ч ийм халуун шатаж үзээгүй юм байна. Мөн Дэлхийн өнцөг булан бүрээс олон мянган теннисний хорхойтнууд цугласан тул өчигдрөөс хойш дугаарласан олон мянган хүн дотогш нэвтрэх ямар ч боломжгүй болжээ.

“Анхаарлаа хандуулахыг хүсье. Тэмцээний эхний өдөр буюу 30-ны даваа гаригийн тоглолтуудыг үзэхээр дугаарлаж зогсоо үзэгчдийн тоо хэтэрсэн тул энд ирж, таагүй сэтгэгдэлтэй буцахгүй байхыг та бүхнээс хүсье. Дээр дурдсан шалтгааны улмаас Уимблдоны тэмцээнийг үзэхээр ирэхгүй байхыг та бүхнээс хичээнгүйлэн хүсэж байна” хэмээн тэмцээнийг зохион байгуулагчдын мэдэгдэлд дурджээ.

Мөн тэмцээнийг үзэхээр дугаарласаар байгаа хүмүүст “Малгай, нарнаас хамгаалах тос, устай ирэхийг та бүхэнд зөвлөе. Зохих бэлтгэлийг заавал хангаарай” хэмээн мэдэгджээ.

Нэгэн теннис сонирхогчийн өгүүлснээр бол өнөө өглөө 7 цагийн үед очиход өмнө нь 9 мянга гаруй хүн дугаарлаад зогсчихсон байжээ.

Экологийн асуудлаар мэргэшсэн доктор Лесли Мабон тайлбар хийхдээ “Их Британид хэт халуу шатаж байгаа нь сүүлийн жилүүдэд Европ даяар давтагдах болсон цаг агаарын үзэгдлийн нэг. Нэг газар хэдэн хоногийн турш халуу шатах үзэгдэл байнга гарах болсон.

Үүнийг халууны бөмбөрцөг үүсэх ч гэж нэрлэж байгаа. Хэт халалтаас ой хээрийн түймэр дэгдэх, хүмүүсийн бие муудах явдал их гарч байгаа тул анхаарал, болгоомжтой байх хэрэгтэй” гэжээ.