10 жил харилцаагүй эцгийнхээ өөд болсныг Елена Докич зарлалаа

Дэлхийн эмэгтэй теннисчдийн чансааны 4-т эрэмбэлэгдэж байсан серби гаралтай Австралийн тамирчин Елена Докич эцгийнхээ өөд болсон тухай сошиал хаягтаа бичжээ. Өнгөрсөн баасан гаригт эцэг нь амьсгал хураасан байна.

Уимлбдонд шөвгийн дөрөвт шалгарч үзсэн Елена Докич сүүлийн 10 жил эцэгтэйгээ харилцаагаа бүрэн тасалсан юм. 2017 онд гаргасан Unbreakable намтар номдоо эцгийнхээ сэтгэл санааны болон биеийн хүчирхийлэл дор байснаа дэлгэн бичсэн бөгөөд сүүлийн жилүүдэд харилцаагаа тасалснаа дурджээ.

“Та бүхний мэдэж байгаачлан аав бид хоёрын харилцаа сэтгэл хөндүүрлэм, хэцүү байсан. Хэдийгээр уулзахаа больж, холдсон ч гэлээ эцэг эхээ алдана гэдэг хэцүү, гашуудалтай юм. Миний сайн мэдэх түүний амьдрал үүгээр дууслаа.  Одоо эсрэг тэсрэг олон бодол төрж байна. Гэвч хамгийн сүүлд би яг энэ зураг шиг түүнийг сайн сайхнаар дурсахыг хүснэ.

Хүндэтгэл, нигүүлсэл, нинжин сэтгэл, нэр төр бас өрөвдөх сэтгэлтэй хүний хувиар түүнийг сайн сайхнаар дурсая. Миний болон гэр бүлийн минь бусад гишүүдийн хувийн амьдралыг хүндлэхийг та бүхнээс хүсье” хэмээн Елена Докич өгүүлжээ. Тэрбээр теннисчний замналаа өндөрлүүлсний дараагаар телевизэд эксперт, хөтлөгчөөр ажиллах болж, тамирчдын сэтгэлзүйн асуудлыг хөндөж ярихыг эрмэлздэг.

Дамир Докич охиноо тэмцээнд авч ирчихээд чанга хашхирдаг, харааж зүхдэг, олон нийтийн газар биеэ зөв боловсон авч явдаггүйгээрээ олон танигдсан нэгэн байжээ. 2009 онд Белград дахь Австралийн Элчин сайдын яамны байшинг дэлбэлнэ гэж сүрдүүлснийхээ төлөө шоронд хоригдсон удаатай.

Елена Докичийн намтар номдоо бичсэнээр бол Дамир байнга гар хүрдэг, нэг удаа ухаан алдтал нь цохиж байсан гэдэг. Түүний намтар номоос сэдэвлэсэн уран сайхны кино хүртэл гарсан юм. “Өнөөдөр зодуулахгүйн тулд би юу хийх ёстой вэ?” гэсэн бодолтойгоор өглөө бүр сэрдэг байлаа” гэж тус кинонд өгүүлдэг ажээ.

Елена Докич постынхоо хамгийн сүүлд “Миний сүүлчийн үг. Амгалан нойрс доо” гэж бичжээ.