"Тавантолгой"-н 19.77%-ийг эзэмшигч "Ажнай корпораци"-ийн эзэн Д.Бат-Эрдэнийг ШАЛГАЖ байна

Уул уурхай, төмөр зам гэдэг хоёр ойлголт бодит байдал дээр нэг зоосны хоёр тал болохыг өнгөрсөн жилүүдийн алдагдсан боломжууд бэлхнээ нотлон харуулсан гэдгийг "НҮҮРСНИЙ ХУЛГАЙ"-н асуудал дахин эрчээ аваад буй энэ үед тодотгоё.

Улс төр, бизнесийн талбарын эрх мэдэл бүхий этгээдүүдээс бүрдсэн бүлэглэл  Тавантолгой ордод сүүлийн арваны туршид  эзэн сууж, төрийн байгууллагуудыг өөрсдийн зоргоороо удирдан, хулгайгаар нүүрс хил давуулахын сацуу төмөр замын төслүүдийг олон он жилээр хүлээлгийн өрөөнд гацаахад гар бие оролцоцгоож, тэр хэрээрээ хөгжлийг боомилсон уу гэдэг сэдэв нийгмийн анхаарлын төвд орж ирээд байна.

Түүнчлэн нүүрсний хулгайн асуудлыг улс төрийн хүрээнд хэлэлцээ тохироогоор дараад өнгөрөх бус уг үндсээр нь уудлан гаргаж ирж, хариуцлага тооцвол дагаад эерэг өөрчлөлтүүд гарах боломжтой талаар ч ярьцгааж буй.

Тэгвэл өнөөдөр /2022.12.05/ ЗГХЭГ-ын  дарга Д.Амарбаясгалан  мэдээлэл хийж, уг асуудлаар мэдээлэл өглөө. Нүүрсний хулгайн асуудлаар Засгийн газар Ажлын хэсэг байгуулах болсныг мэдэгдлээ.

Тэрбээр "2017 оноос эхэлж Цагдаагийн ерөнхий газрын Эдийн засгийн гэмт хэрэгтэй тэмцэх хэлтэст "Эрдэнэс Тавантолгой"-н нэг мөргөцөг буюу 385 орчим мянган тонн нүүрсний хэрэг шалгагдаж байгаа. Энэ бол "Эрдэнэс Тавантолгой" болон жижиг "Тавантолгой" компаниудын хооронд нүүрсний зөрүүтэй байдал үүссэн тухай асуудал юм. Энэ талаар 2017, 2018 онд сайд, УИХ-ын гишүүд олон нийтэд мэдээлж байсан. Харамсалтай нь, өнөөдрийг хүртэл хариу нь тодорхой гараагүй байна. Үүнд,  УИХ-ын нэр бүхий гишүүн жижиг "Тавантолгой" компанийн эзэмшигчийнхээ хувиар шалгагдаж байгаа. 

Засгийн газраас "Эрдэнэс Тавантолгой" компанийн 385 мянган  тонн нүүрсний хулгайн асуудлыг хөндсөн болон Бүрэн эрхт төлөөлөгч томилсонтой холбоотойгоор одоогоор 15 орчим албан тушаалтан Авлигатай тэмцэх газарт  шалгагдаж байна. Үүнд,  Засгийн газрын, төрийн өмчийн, яамд, агентлагийн тодорхой төлөөлөл багтсан байна. Гэм буруутай эсэхийг нь шүүхийн байгууллага шийдвэрлэнэ. 

Засгийн газрын гомдлоор тодорхой нэр бүхий хүмүүс шалгагдаж байгаа гэдгийг хэлэх нь зүйтэй. Ард түмэн үзэл бодлоо илэрхийлж, үгээ хэлж, талбай дээр жагсаж байна. Гэхдээ үймээн самуун дэгдээх оролдлого хийх аюул байдаг. Аливаа асуудлыг яриа, хэлэлцээрийн шугамаар шийдвэрлэх ёстой. Засгийн газрын зүгээс нээлттэй хандана. Тиймээс миний биеэр ахлуулж, Засгийн газраас Ажлын хэсэг гаргалаа. Ажлын хэсгийнхэн жагсаал, цуглаан зохион байгуулж байгаа хүмүүстэй уулзаж, шаардлагыг хүлээн авч, хамтдаа асуудлыг шийдвэрлэхэд санаачилга гарган ажиллахаа илэрхийлье" гэсэн юм. 

Тэрбээр  "Хуулийн хүрээнд зарим нэрсийг ил болгож байна гээд  "Эрдэнэс Тавантолгой" компанийн захирал асан  Д.Ариунболд, Б.Ганхуяг, "Эрдэнэс Тавантолгой"-н Х.Нурлат, Б.Отгонжаргал,  "Тавантолгойн төмөр зам"-ын захирлаар ажиллаж байсан Н.Удаанжаргал болон гаалийн байгууллагын нэр бүхий албан тушаалтнуудын талаар мэдээлсэн. 

Түүнчлэн  "Тавантолгой" ХК-ийн томоохон хувьцаа эзэмшигч УИХ-ын гишүүн болон Өмнөговь аймгийн Засаг дарга нарыг ЦЕГ-ын ЭЦА-нд шалгаж байгаа талаар гэсэн юм. Тэгэхээр энд дурдагдаж буй томоохон хувьцаа эзэмшигч, УИХ-ын гишүүн гэдэг нь Д.Бат-Эрдэнэ гэдэг нь МХБ-ийн албан ёсны веб хуудас дахь  "Тавантолгой" ХК-ийн нөлөө бүхий хувьцаа эзэмшигчийн мэдээллээс ойлгогдож буй юм.

Учир нь "Тавантолгой" ХК-ийн 19.77%-ийг "Ажнай корпораци" ХХК эзэмшдэг. Д.Бат-Эрдэнэ гишүүн "Ажнай корпораци" ХХК-д хувь эзэмшдэгээ АТГ-т тайлагнадаг хөрөнгө орлогын мэдүүлэгтээ тусгасаар өнөөдрийг хүрсэн. 

Мөн нүүрсний хулгайд нэр холбогдсон засаг дарга гэдэг нь Р.Сэддорж юм. Тэрбээр өөрийг нь шалгаж байгаа гэх мэдээллийг үгүйсгэж байсан ч нүүрсний хулгайн асуудлаар хуулийнханд шалгагдаж буйг нь ЗГХЭГ-ын дарга баталгаажууллаа.