"Ноён эмэгтэй"-н шинэ босго

Байгуулагдсан цагаасаа эхлэн Монголын кино урлагийн салбарт цоо шинэ өнгө, цензур тогтоох болсон "Хувьсал" продакшны хамт олон хэдхэн хоногийн өмнө "НОЁН ЭМЭГТЭЙ" уран сайхны киногоо нээлээ. Харин тэдний сүүлийн гурван жилийн хөдөлмөрт үзэгчид дүн тавих учир киноны талаар нурших нь илүүц биз.

Ямартай ч У.Уранчимэг гавьяат баг хамт олныхоо авьяас, хөдөлмөрийг үнэлж чаддагаа харуулж, шинэхэн уран бүтээлийн нээлт дээр продакшныхаа жүжигчин Г.Бямбасүрэнд нэг өрөө байр бэлэглэлээ.

Г.Бямбасүрэнгийн хувьд 2019 онд театрын үзвэрийг үзэгчдийн тоогоор тэргүүлж, рекорд тогтоож байсан "Тэнгэрээс буусан од" киноны зохиолыг бичсэн бол энэ удаа мөн "Ноён эмэгтэй"-н зохиолыг бичжээ. Тэрээр кино зохиол бичиж, найруулахын зэрэгцээ "чанга" дуучин гэдгээ "Хайр" жүжиг, "Би эр хүнд хайртай", "Тэнгэрээс буусан од" киноны дуунуудыг дуулснаар харуулж чадсан.

"Хувьсал"-ын бэлэг үүгээр дуусаагүй. Нээлтийн үeэр киноны арын албанд ажилласан уран бүтээлчдээсээ хөдөлмөрийн аварга тодруулан дөрвөн хүнд мөнгөн шагнал олголоо. Энэ мэтчилэн залуу уран бүтээлчдийнхээ хөдөлмөрийг үнэлж, "Ноён эмэгтэй"-н нээлт дээр аргагүй л ноён шиг аашилсан У.Уранчимэг гавьяат "байр бэлэглэдэг" босго тогтоож буй бололтой. Өмнө нь "Тэнгэрээс буусан од" киноны нээлт дээр мөн продакшныхаа залуу жүжигчин Б.Баярмаад байр бэлэглэж байв.