Дорнод аймагт шугам сүлжээний шинэчлэл хийх тухай хариу ирүүлжээ

УИХ-ын гишүүн Ц.Сэргэлэн өнөөдөр /2022.05.04/ цахим хуудсаараа “Барилга, хот байгуулалтын сайд Б.Мөнхбаатар хүсэлтийг минь хүлээн авч, холбогдох мэргэжилтнүүд газар дээр нь танилцан асуудлыг шийдвэрлэхээр ажиллаж байгаа тухай хариу ирүүлжээ.

Дорнод аймгийн Хэрлэн сумын иргэд та бүхэндээ зуны эхэн сарын мэндийг хүргэе.

Дорнод аймгийн ИТХ-ын дарга М.Энхтөр, төлөөлөгч Ц.Сүхбаатар, Б.Мөнх-Оргил, Э.Эрдэнэчулуун нар нь 2022 оны 4 дүгээр сарын 6-ны өдөр уулзаж Чойбалсан хотын иргэдэд тулгамдаж буй зэвтэй усны асуудал, шугам сүлжээг шинэчлэх шаардлагатай байгаа талаар хүсэлт тавьсан. Мөн аймгийн засаг дарга М.Бадамсүрэнгээс уг асуудлыг шийдвэрлэхэд орон нутгийн төсвөөс тодорхой хувийг гаргахаар ажиллаж байгаа боловч бүрэн шийдэх боломжгүй байгаа тухай албан бичиг ирүүлсэн.

Иймд миний бие уг асуудлыг шуурхай ажил хэрэг болгох, шаардлагатай төсвийг 2023 оны Улсын төсөвт тусгуулах болон бусад эх үүсвэрээс шийдвэрлүүлэх үүднээс  Барилга, хот байгуулалтын сайдад 2022 оны 4 дүгээр сарын 15-ны өдрийн УИХ-03/3585 дугаартай албан бичгээр хандсан” хэмээн бичжээ.

Тус албан бичгийн дагуу холбогдох мэргэжилтнүүд Дорнод аймагт газар дээр нь ажиллаж, нөхцөл байдалтай танилцаж, шаардлагатай арга хэмжээг шуурхай авч ажиллаж байгаа мөн шугам сүлжээний насжилтаас хамаарсан засвар шинэчлэл хийх, шинээр барих төслийг 2023 оны Улсын төсвийн хөрөнгө оруулалт болон бусад санхүүжилтээр хэрэгжүүлэх санал боловсруулан Сангийн яаманд хүргүүлэхээр ажиллаж байгаа тухай хариу ирүүлжээ.