“МАК”-ийн Б. Нямтайшир гаднаас 1300 ажилчин авах хүсэлтэй явна

Дорноговь аймагт  цементийн үйлдвэрүүд баригдаж байгааг уншигчид сонссон биз ээ. Даланжаргалан сумын нутагт орших элс, хайрга, гөлтгөнө, шохойны орд газрууд дээр түшиглэн МАК, Гермес Гахиур компани цементийн үйлдвэр байгуулж байна.   МАК компанийн Хөх цавын  цементийн үйлдвэр  ирэх оны гуравдугаар улиралд ашиглалтанд орох боломжтой байна.  Барилга, хот байгуулалтын сайд Ц.Баярсайхан болон БХБЯ-ны Төрийн нарийн бичгийн дарга Р.Эрдэнэбүрэн, БХБЯ-ны ББМҮБХЗГ-ын дарга Б.Цэдэнсамба нар үйлдвэрийн барилгын ажилтай танилцсан байна.

Ирэх жил үйлдвэрийн тохиргоог хийх нарийн мэргэжлийн ажилчид нэн шаардлагатай байгаа гэнэ. 1300 ажиллах хүчин гаднаас авахыг Засгийн газраас зөвшөөрч квот өгвөл ирэх жилийн өдийд үйлдвэрийнхээ нээлтийг хийнэ гэж МАК ХХК-ийн ерөнхийлөгч Б. Нямтайшир хэлсэн байна.

Хөх цавын цементийн үйлдвэр нь шилдэг технологи болох хуурай аргаар цемент үйлдвэрлэнэ.  Шинэ үйлдвэр нь жилд 1-2 сая тонн цемент үйлдвэрлэх хүчин чадалтай.  Шинэ технологи,   шилдэг тоног төхөөрөмж оруулж ирэх үүднээс  Данийн Flsmidth компанитай  төслөө хамтран хэрэгжүүлж байгаа аж.

Орчин үеийн цементийн энэхүү үйлдвэрийг БНХАУ-ын JHY компанийн ажилчид 1 жилийн дотор гол нурууг нь босгосон байв. Эдний үйлдвэрээс PC42,5  PC52,5  PC62,5 маркийн цемент гарах бөгөөд эх орныхоо барилгын материал үйлдвэрлэгчдийг цементээр хангахаас гадна цаашид экспортонд гаргах боломжтой гэнэ.

Манай улсын цементийн жилийн хэрэгцээ 4 сая тонн-д  дөхөж байна. Хөх цавын үйлдвэр бүрэн хүчин чадлаараа ажиллавал жилд 2 сая тонн орчмыг Хөтөл 1 сая тонныг бусад жижиг үйлдвэрүүд үлдсэн хэрэгцээг хангах дүр зураг  ирэх оны эцэс гэхэд харагдаж байгаа аж.