Л.Мөрдоржийн нэрэмжит үндэсний хөгжимчдийн улсын II уралдаан болж байна

Ардын жүжигчин, төрийн хошой шагналт Л.Мөрдоржийн нэрэмжит "Үндэсний хөгжимчдийн улсын II уралдаан" өчигдөр эхэлсэн.

Хоёр шаттайгаар явагдах энэхүү уралдаанд 105 хөгжимчин ятга, лимбэ, ёочин, морин хуур, шанз, хуучир, эвэр бүрээ гэсэн долоон төрлийн хөгжмийн зэмсгээр үндэсний болон дэлхийн сонгодогуудыг эгшиглүүлэн энэ сарын 16-ны өдрийг хүртэл өрсөлдөнө.

Уралдааны салхийг хоёрхон чавхдсаар хорвоог уяраах увидастай морин хуурын хөг аялгуугаар үргээж дараа нь мөн л дэлхийд гайхагддаг эвэр бүрээ хөгжмийн чамин тансаг аялгуу үргэлжилсэн.

Үндэсний хөгжимчид өнөөдөр хуучир, лимбэ хөгжмийн гайхамшгийг мэдрүүлэн өрсөлдөх юм.

Т.Ялгуун