Тайланд, Камбожийн мөргөлдөөнийг зохицуулах уулзалт энэ сарын 22-нд болно

Зүүн өмнөд Азийн Холбоо буюу АСЕАН-ы гадаад хэргийн сайд нар Тайланд, Камбожийн хил дээрх хурцадмал байдлыг шийдвэрлэх асуудлыг хэлэлцэх зорилгоор энэ сарын 22-нд тусгай уулзалт хийнэ гэж Малайзын гадаад хэргийн яам мэдэгджээ.

Эл уулзалт нь энэ сарын 11-нд Малайз, Тайланд, Камбожийн ерөнхий сайд нарын гаргасан шийдвэрийн мөрөөр авч буй арга хэмжээний нэг хэсэг юм. Тусгай уулзалтыг энэ сарын 16-нд хийхээр төлөвлөсөн ч Бангкокийн хүсэлтээр товыг арванхоёрдугаар сарын 22 хүртэл хойшлуулсан байна.

Үүнээс өмнө мөргөлдөөнд оролцогч талууд нэг хоногийн дотор зэвсэгт мөргөлдөөнөө зогсоож, энхийн хэлэлцээрээ биелүүлэхээр тохиролцсон тухай АНУ-ын ерөнхийлөгч Доналд Трамп мэдэгдэж байсан билээ. Малайзын ерөнхий сайд тус хоёр улсын хил рүү АСЕАН-ы ажиглагчдыг илгээх санаачилга гаргасан юм.