Дэлхийн хамгийн тачаангуй хөлбөмбөгчид бие хамгаалагч гаргаж өгчээ

Швейцарийн шигшээ болон Италийн “Ювентус”-ын тоглогч Алиша Леманн царай зүс, бие галбир мөн сошиал идэвхээрээ Дэлхийн хамгийн тачаангуй хөлбөмбөгч бүсгүй гэх алдрыг хүртсэн нэгэн.
 

Тэгвэл Швейцарьт болж буй Европын хөлбөмбөгийн АШТ-д Алиша Леманнд зориулан тусад нь бие хамгаалагч гаргаж өгсөн байна. Бэлтгэл, тоглолтын өмнө ба дараагаар маш олон хүн Леманнтай зураг даруулах, гарын үсгийг нь авахыг хүсдгийн зэрэгцээ мөн үзэн ядагчид ч байдаг учир Швейцарийн Хөлбөмбөгийн Холбоо ийм шийдвэр гаргажээ.
 

“Аль ч стадионд тоглолт боллоо гэсэн бид хамгийн түрүүнд хөлбөмбөгчдийнхөө аюулгүй байдлыг нэн тэргүүнд хангах ёстой. Алиша Леманн их алдартай тул тоглолтын өмнө ба дараа түүнд ойртож очихыг маш олон хүн хүсдэг. Тиймээс Леманныг тусад нь хамгаалуулахаар болсон” хэмээн Швейцарийн шигшээ багийн хэвлэлийн ажилтан мэдэгджээ.
 

Инстаграмд 17 сая дагагчтай Алиша Леманн хөлбөмбөгийн хараад байдаггүй өнцгөөс шигшээ багийн доторх уур амьсгалыг харуулдаг. Гэхдээ өөрөө бол өнөө орой Испанитай хийх тоглолтын гараанд гарахгүй байх магадлал өндөртэй юм. Өмнөх тоглолтод түүнийг сүүлчийн хэдхэн минут л тоглуулсан.
 

Алиша Леманн найз залуу, бразил хагас хамгаалагч Дуглас Луисийг даган Английн “Астон Вилла”-гаас Италийн “Ювентус”-т очсон. Гэлээ ч хоёулаа багийнхаа гол тоглогч болж чадаагүй. Дуглас Луис үүнтэй үл эвлэрч, Италийн клубээс явахаар зэхэж буй бол Алиша Леманн 2027 оны зун хүртэлх гэрээгээ дуусгавар болтол үлдэх бололтой. Дуглас Луистай ч харилцаагаа тасалсан.
 

Өчигдөр тус тэмцээний шөвгийн наймд Англи-Швед тоглож, 2:2-оор тэнцээд пенальтиар эрслэнгууд 3:2-оор хожжээ.