Лавров: Киевийн үйл ажиллагааны баримтууд олон нийтэд ил байх ёстой

ОХУ-ын Гадаад хэргийн сайд Сергей Викторович Лавров ажлын айлчлал хийхээр өнөөдөр (2022.07.05) өглөө манай улсад хүрэлцэн ирлээ.

ОХУ Киевийн дэглэмийн үйл ажиллагааны талаарх баримтууд дэлхий нийтэд нээлттэй байлгах сонирхолтой байна. Гэсэн хэдий ч өрнөд Украинд болж буй үйл явдлын талаар бодит мэдээлэл өгч буй хэвлэл мэдээллийн хэрэгслүүдийн үйл ажиллагааг хаахын тулд бүхий л арга хэмжээ авч байна гэж ОХУ-ын Гадаад хэргийн сайд Сергей Лавров Монгол Улсын Гадаад харилцааны сайд Батмөнхийн Батцэцэгтэй хийсэн хэлэлцээний дүнгээр болсон хэвлэлийн бага хурал дээр мэдэгджээ.

С.Лавров хэлэлцээний үеэр Украин болон Донбасс дахь Украины цэргийн ажиллагааны талаар дэлгэрэнгүй мэдээлэл өгсөн байна.

Түүний хэлснээр, өрнөдийн бодлогын хамгийн аюултай үзэгдлийн нэг нь Украиныг Оросын эсрэг дайсагнасан, неонацист улс, цэргийн түшиц газар болгох урт хугацааны үйл ажиллагаа байсан гэж мэдэгдсэнийг ТАСС агентлаг дамжуулжээ.

Айлчлалын хүрээнд ОХУ-ын Гадаад хэргийн сайд С.В.Лавров Монгол Улсын Гадаад харилцааны сайд Б.Батцэцэг ОХУ-ын Гадаад хэргийн сайд С.В.Лавровтой хэлэлцээ хийснийхээ дараа Ерөнхийлөгч У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ нарт тус тус бараалхана.

Эдгээр уулзалтын үеэр Монгол, Оросын иж бүрэн стратегийн түншлэлийн харилцааг бодит агуулгаар баяжуулах төслүүдийг урагшлуулах, манай улсын эдийн засгийн чухал ач холбогдолтой зарим асуудлыг хэлэлцэхээр төлөвлөж байна. Тухайлбал, Монгол, Оросын хилийн шалган нэвтрүүлэх боомтуудыг шинэчлэн өргөтгөх, “Алтанбулаг”, “Цагааннуур” чөлөөт бүсүүдэд оросын талаас хөрөнгө оруулалт хийн хамтарсан үйл ажиллагаа эрхлэх, газрын тосны бүтээгдэхүүний найдвартай нийлүүлэлтийг хангах, эрчим хүч, соёл, боловсролын салбарт хамтран ажиллах зэрэг асуудлаар талууд ярилцах ажээ. Мөн олон улсын байгууллагуудын хүрээнд хэрэгжүүлж буй хамтын ажиллагаа, олон улсын харилцааны цаг үеийн асуудлаар талууд байр сууриа илэрхийлэх ажээ.