СЭРЭМЖЛҮҮЛЭГ: Гэртээ байсан хоёр хүүхэд галд өртөж, нас баржээ

Нийслэлийн Сүхбаатар дүүргийн 15 дугаар хороонд гэр шатаж байна гэсэн дуудлага Нийслэлийн Онцгой байдлын газарт өчигдөр (2018.12.25) 11:12 цагт иржээ. Дуудлага хүлээн авсан даруйд тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн найман алба хаагч, хоёр автомашинтай 11:20 цагт очиж, 20 минутад галыг унтраажээ. Харамсалтай нь, галын улмаас иргэн С /69 настай, эрэгтэй/, Х /9 настай, эмэгтэй/, Ү /5 настай, эрэгтэй/ нар нас барсан байна. 

Онцгой байдлын ерөнхий газраас өчигдөр (2018.12.25) мэдээлэл хийж, ахуйн гал түймрийн аюулаас урьдчилан сэргийлэх зөвлөмж, сэрэмжлүүлэг өгснийг дахин сануулъя!

СЭРЭМЖЛҮҮЛЭГ

2018 онд улсын хэмжээнд ахуйн гал түймэр 3826 удаа гарч, 16.3 тэрбум төгрөгийн хохирол учирч, 77 хүн галын улиаас амь насаа алдсан байна. Үүний 33 нь том хүн, 44 нь хүүхэд байжээ. Иймд иргэн та өөрийн болон бусдын амь нас, эрүүл мэнд, эд хөрөнгөд учирч болзошгүй гал түймрийн аюулаас урьдчилан сэргийлээрэй.

• ЕБС-ийн сурагчдын амралт эхэлсэн байгаа учраас бага насны хүүхдийг хараа хяналтгүй гэрт нь цоожилж үлдээхгүй байх /2018 онд 33 хүүхэд, 44 том хүн/, пийшин, зуух яндангийн эвдрэл гэмтлийг засч, хүүхэд хүрч, түлэгдэх, гэмтэхээс сэргийлэх, цахилгааны утас, залгуур, ил гарах зүйлс, шатах, тослох материалыг бага насны хүүхдээс хол байлгах шаардлагатай.

• Халуун үнс нурам, галтай хог хаягдлыг хогийн ил цэгт хаяхгүй байх, шингэрүүлсэн шатдаг хийгээр болон цахилгаанаар ажилладаг тулга, зуухыг ашиглахдаа аюулгүй ажиллагааны дүрэм, журмыг баримтлах шаардлагатай.

• Цахилгааны шөнийн тарифыг хөнгөлсөнтэй холбогдуулан цахилгаан халаагуур, халаагчийг гэр, байшин, аж ахуйн нэгж, байгууллагадаа суурилуулахаар сонгосон бол цахилгаан ашиглалтын дүрэм, журмыг мөрдөх, аюулгүй ажиллагааны заавар, зааварчилгаа авах, мэргэжлийн цахилгаанчаар холбуулах, холбогдох байгууллагаас өгч байгаа заавар, зөвлөмжийг дагаж мөрдөх”-ийг зөвлөж байна.
  

Д.ДАМДИН

WWW.ZINDAA.MN