Монгол Улс, БНХАУ, ОХУ-ын төрийн тэргүүн нарын УУЛЗАЛТ БОЛОВ

Бээжин хотноо Монгол Улсын ерөнхийлөгч Ухнаагийн Хүрэлсүх, БНХАУ-ын дарга Ши Жиньпин, ОХУ-ын ерөнхийлөгч Владимир Путин нарын гурван талт уулзалт эхэлжээ. Ардын төлөөлөгчдийн ордонд болж буй энэ удаагийн уулзалт нь долоо дахь удаагийнх юм.

Монгол Улс нь мөнхийн хөрш, иж бүрэн стратегийн түнш болох ОХУ, БНХАУ-тай гурван талт хамтын ажиллагааг бүхий л салбарт гүнзгийрүүлэн хөгжүүлэх чиглэлд тууштай хүчин чармайлт гаргаж байна гэж уулзалтын үеэр Монгол Улсын ерөнхийлөгч У.Хүрэлсүх онцолжээ.

Монгол, Орос, Хятадын ард түмнүүд Дэлхийн хоёрдугаар дайны тухай түүхэн үнэнийг гуйвуулахыг үл зөвшөөрөх асуудалд нэгдмэл буй тэрбээр мэдэгдээд энэхүү уулзалт нь хамтын агуу их ялалтыг тэмдэглэж буй ойтой давхцаж буйгаараа түүхэн ач холбогдолтой болохыг дурджээ.

БНХАУ-ын дарга Хятад улс нь Монгол Улс, ОХУ-тай хамтран гадаад саад тотгорыг арилган, гурван талт хамтын ажиллагааг чанарын өндөр түвшинд хөгжүүлэхэд бэлэн гэдгээ илэрхийлэв. Бээжин хоёр түнш орнуудтайгаа улс төрийн харилцан итгэлцлийг бэхжүүлэхийг зорьж байна гэж Ши Жиньпин дурдаан Бээжин, Улаанбаатар, Москвагийн хамтын ажиллагаанд эдийн засгийн коридор байгуулах хөтөлбөрийн хүрээнд хэрэгжүүлж буй хамтарсан төслүүд шинэ түлхэц үзүүлж буйг онцолсон байна.

В.Путин ОХУ нь Монгол Улс, БНХАУ-тай харилцаагаа хөгжүүлэхийг эрмэлздэг гэж онцлоод гурван талт хамтын ажиллагааг шинэ салбаруудаар тэлэх нь чухал гэв. Манай гурван улсыг нөхөрлөл, харилцан дэмжлэг үзүүлэх уламжлал нэгтгэдэг гэж онцлон тэмдэглэжээ.