Трамп: Обама эргэж ирэхгүй, Украин НАТО-д элсэхгүй, зарим зүйл хэзээ ч өөрчлөгдөхгүй!

Украины Ерөнхийлөгч Владимир Зеленский өнөөдөр Вашингтонд уулзалттай. Цагаан ордоны Ерөнхийлөгчийн албаны өрөөнд түүнээс гадна Францын Ерөнхийлөгч Эммануэль Макрон, Германы канцлер Фридрих Мерц, Их Британийн Ерөнхий сайд Кир Стармер нар мөн цуглах болно.

Тэд Орос-Украины дайныг зогсоох талаар Аляскт ОХУ-ын Ерөнхийлөгч Владимир Путинтай хийсэн уулзалтын талаар Доналд Трампаас сонсож, ямар шаардлага тавьсан, зөвшилцөлд яавал хүрч болох талаар ярилцах юм.

Энэ уулзалтаас урьтаж АНУ-ын Ерөнхийлөгч Доналд Трамп өөрийн Truth Social хаягтаа байр сууриа илэрхийлээд амжлаа. “Украины Ерөнхийлөгч Зеленский Оростой хийж буй энэ дайныг хүсвэл тэр дор нь зогсоох боломжтой. Эсвэл үргэлжлүүлэн тулалдаж ч болно...Обама эргэж ирэхгүй. Украин улс НАТО-д элсэхгүй. Зарим зүйл хэзээ ч өөрчлөгдөхгүй” хэмээн Трамп бичжээ. Үүнийхээ дараа Европын олон лидерийг Цагаан ордондоо хүлээн авч уулзана гэдэг нэр төрийн явдал байх болно гэсэн байна.

Ням гаригийн орой Вашингтонд буусан Зеленский “Урилга илгээсэн АНУ-ын Ерөнхийлөгчид талархая. Бид ч гэсэн энэ дайнд түргэхэн цэг тавихыг хүсч байгаа. АНУ болон Европын нөхдийнхөө хамтаар ОХУ-ыг бид жинхэнэ энхтайванд хүртэл тулгаж чадна гэж найдъя” гэж мэдэгджээ.

Аляскт болсон уулзалтыг Путины ялалт гэж олон хэвлэл дүгнэж байгаа. АНУ-ын тусгай төлөөлөгч Стив Виткофф ОХУ анх удаагаа АНУ болон Европын улсуудад Украиныг хамгаалахыг зөвшөөрлөө гэж мэдэгдсэн юм.