БНСУ-ын “Колон Глобал” компани "Солонго" хорооллын төсөлд шалгарчээ
Эх сурвалж: Ёнхап агентлаг
Монгол Улсын Засгийн газрын үйл ажиллагааны хөтөлбөрт хэрэгжүүлэхээр тусгагдсан нийгэм, эдийн засгийн чухал ач холбогдол бүхий “Солонго" орлогод нийцсэн орон сууцны хороолол барих төслийг БНСУ-ын Эдийн засгийн хамтын ажиллагааны хөгжлийн сангийн хөрөнгөөр хэрэгжүүлэхээр шийдвэрлэсэн.
Тэгвэл БНСУ-ын “Колон Глобал” компани Улаанбаатар хотод 295.7 тэрбум вонны хөрөнгө оруулалттай барилгын төслийг хэрэгжүүлэхээр сонгон шалгаруулалтад тэнцсэнээ өнөөдөр (2023.08.04) зарлалаа.
“Солонго-1”, “Солонго-2” орон сууцны хорооллыг БНСУ-ын хөнгөлөлттэй зээлээр Хан-Уул дүүргийн 10 дугаар хорооны нутаг дэвсгэрт барих юм.
Эхний ээлжинд "Солонго 1" төсөлд 2712 өрхийг хамруулж, энэхүү бүтээн байгуулалтад 160.5 тэрбум вон зарцуулахаар төлөвлөжээ.
Хоёр дахь нь буюу "Солонго 2" төсөлд 2290 өрхийг хамруулах ба 135.2 тэрбум воны хөрөнгө оруулалт хийх юм байна.
"Солонго" орлогод нийцсэн орон сууцны хороолол ашиглалтад орсноор 5002 айл шинэ байртай болох ба барилгын ажлыг төсөл тус бүр дээр 41 сарын хугацаанд үргэлжлэхээр төлөвлөжээ.
“Колон Глобал” компанийн албаны хүн хэлэхдээ “Улаанбаатар хот бол Монгол Улсын хүн амын талаас илүү хувь нь оршин суудаг, хүн ам шигүү суурьшсан бүс. Тийм ч учраас шинэ хотхон байгуулах хэрэгцээ шаардлага бий болж байна. Бид ирээдүйн бизнесүүдийн амжилтын үндэс суурийг амжилттай тавих болно" гэжээ.
Холбоотой мэдээ
Сэтгэгдэл ( 5 )
Солонго хорооллын сураг хэдэн жилийн л өмнө гарч байсан. Одоо дөнгөж шийдэж байгаа юм уу? Ирэх хавраас эхэлдэг л байгаа даа ккк
Эхлэх гэж 10 жил болдог гэж үнэншдээ
юун солонгос байхав дээ чоожоо ах тендэрийг шаачийшдэ ххэ
Лалар байршилаа зөв сонголдоо утгаа алдлаа энэ хавьд чинь
Болж л байна, Солонгосчууд өөрсдийгөө хятад, монгол хоёроос илүү гэдгээ нотлохоор барилга барих байлгүй дээ. Япончуудын хийсэн юм үргэлж нэр хүндтэй байдаг шиг Солонгосчууд ч мөн тийм байх байлгүй дээ.