Мөнгөн ус хилээр нэвтрүүлж, худалдах гэж байсан хэргийг илрүүллээ

Б.Гантуяа | Zindaa.mn
2023 оны 02 сарын 02

Экологийн цагдаагийн албанаас энэ оны нэгдүгээр сарын 30-ны өдөр Химийн хорт аюултай бодис улсын хилээр нууцаар нэвтрүүлж, бусдад их хэмжээний мөнгөөр худалдан борлуулах гэж байсан үйлдлийг таслан зогсоолоо. 

Тодруулбал, Монгол Улсын иргэн Г.Б нар нь  хоёр кг мөнгөн усыг улсын хилээр хууль бусаар нэвтрүүлсэн байсныг хураан авч, мөрдөн шалгах ажиллагаа явуулж байна.

Дээрх иргэдийн үйлдэл нь Эрүүгийн хуулийн 24.3 дугаар зүйлд заасан “Химийн хорт, аюултай бодисыг хууль бус эргэлтэд оруулах” гэмт хэрэг юм.

Монгол Улсын Засгийн газрын 2007 оны 95 дугаар тогтоолоор мөнгөн ус болон мөнгөн усны органик, органик бус нэгдлүүдийг “Монгол Улсад ашиглахыг хязгаарласан химийн бодисын жагсаалт”-д оруулж, Байгаль орчны сайдын 2008 оны тушаалаар мөнгөн усыг ашигт малтмалын олборлолт, боловсруулалтад ашиглахыг хориглосон.

Мөнгөн ус болон түүний нэгдэл агуулсан бодис нь хүрээлэн байгаа орчныг ноцтой бохирдуулж, хүн, мал, амьтны биед амьсгалын зам, арьс болон хоол хүнс, идэш, тэжээлээр дамжин нэвчин орж, амьсгалын тогтолцоо, нүд, арьс салстыг хордуулж, төв мэдрэлийн системийг гэмтээж, удмын санд нөлөөлж удаан хугацааны туршид хордуулдаг онцгой хортой бодис юм.

Мөнгөн ус нь Дэлхийн хэмжээнд 1 сая гаруй химийн хорт аюултай бодис байдгаас хүн, амьтан, мал, байгаль орчинд үзүүлэх хортой чанараар 6-д эрэмбэлэгддэг бөгөөд хүний амьсгалын тогтолцоо, нүд, арьс салстыг хордуулж, төв мэдрэлийн системийг гэмтээж, удмын санд нөлөөлдөг химийн хорт аюултай бодис юм.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top