Гадаад харилцааны сайд Б.Батцэцэг Норвeгийн хаант улсад айлчилж байна

Гадаад харилцааны сайд Б.Батцэцэг Норвег Улсад хийж буй албан ёсны айлчлалынхаа хүрээнд тус улсын Олон улсын хөгжлийн сайд Оoсмүнд Грөвер Аүкрүсттэй уулзалт хийж, олон улсын хөгжлийн хамтын ажиллагааны хүрээнд хоёр улсын харилцааг өргөжүүлэх талаар болон олон улсын харилцааны зарим асуудлаар санал солилцлоо.

Уулзалтаар талууд ардчилал, хүний эрх, хууль дээдлэх нийтлэг үнэт зүйлсэд тулгуурласан Монгол, Норвегийн харилцааг эдийн засаг, хөрөнгө оруулалтын агуулгаар баяжуулах, энэ хүрээнд сэргээгдэх эрчим хүч, байгаль орны хамгаалал, ойн аж ахуй, ногоон технологи, боловсрол, соёл, аялал жуулчлалын салбарт хамтын ажиллагааг өргөжүүлэх өргөн боломж байгааг онцоллоо.

Мөн олон талт хамтын ажиллагааны хүрээнд манай хоёр улс үр дүнтэй хамтран ажиллаж буйг онцолсон бөгөөд “Сонгуульд нэр дэвшигчид, улс төрийн намууд болон сонгуулийн кампанит ажлын санхүүжилтийн ил тод байдлыг нэмэгдүүлэх тухай” НҮБ-ын тогтоолыг Норвег Улстай хамтран санаачилж, батлуулсныг тэмдэглэлээ.

Энэхүү үр дүнтэй хамтын ажиллагааг цаашид бататгах, тухайлбал, уур амьсгалын өөрчлөлт, цөлжилттэй тэмцэх, бэлчээр, хөрсний зохистой менежмент, ойжуулалт зэрэг чиглэлээр хамтран ажиллах санал тавьж, энэ оны 8 дугаар сард Улаанбаатар хотод болох НҮБ-ын цөлжилттэй тэмцэх конвенцид оролцогч талуудын 17 дугаар бага хуралд сайд Оосмүнд Грөвер Аүкрүстийг оролцохыг урилаа.

Сайд Б.Батцэцэг Монгол Улсад 2024 онд батлагдсан Үндэсний баялгийн сангийн тухай хуулийн хүрээнд байгуулагдсан “Чингис хаан” Үндэсний баялгийн сангийн үйл ажиллагааны талаар танилцуулж, баялгийн сангийн засаглал, хөрөнгийн удирдлагын тэргүүлэх туршлагаа манай улстай хуваалцаж байсан Норвегийн Засгийн газарт талархал илэрхийлэв.