Дэлбэрэлтэд өртсөн 207 дугаар байрыг буулгаж дууслаа

Баянзүрх дүүргийн нутагт 2024 оны нэгдүгээр сард болсон хийн түлшний дэлбэрэлтэд өртсөн 207 дугаар байрыг бүрэн нурааж дуусжээ. Албаны хүмүүсийн хэлж байгаагаар 30 гаруй ажилтан нураах, буулгах ажилд оролцсон байна. Уг барилгыг нураах ажил энэ оны есдүгээр сарын 25-наас эхэлсэн билээ.

Энэ тухай “Барилгын хог хаягдлыг дахин боловсруулах үйлдвэр” ОНӨААТҮГ-ын дарга Ц.Болд хэлэхдээ “Нийтдээ115 хоногийн хугацаанд 13 давхар 207 дугаар байрыг бууулгалаа. Барилгыг буулгахад 10 гаруй машин техник, 30 гаруй ажилтан амралтгүйгээр ажилласан. Ажлын гүйцэтгэлэд Нийслэлийн хөрөнгө оруулалтын газар хяналт тавьж, улсын комисс өчигдөр хүлээж авлаа. Одоо барилгын хамгаалалтын хашааг авч, цэвэрлэгээний ажлыг гүйцэтгэнэ” гэсэн юм.

Харин шинээр барилга барих болон хохирогчдын хохирлыг барагдуулах талаар Нийслэлийн Засаг дарга бөгөөд Улаанбаатар хотын захирагч Х.Нямбаатар энэ тухай хэлэхдээ “Уг орон сууцны барилгыг дахин шинээр барих тендерийг ирэх долоо хоногт зарлаж, tender.gov.mn цахим хуудас болон бусад сайтуудад тендерийн урилгыг нийтэлнэ. Барилгыг шинээр барих төсвийг баталсан. Татвар төлөгчдийн мөнгөөр иргэдийн хохирлыг барагдуулж, газын дэлбэрэлтийн бруу байгууллагаас нураал болон буцааж барьсан бүх зардлыг нийслэл авахаар иргэний нэхэмжлэл гаргасан. Ирэх оны өдийд тухайн байрны оршин суугчдад өмнө нь амьдарч байсан талбайн хэмжээг хэвээр нь хүлээлгэж өгөхийг хичээж ажиллана” гэлээ.

Дэлбэрэлтэд өртсөн 207 дугаар байрны буурин дээр орон сууц барих ажилд ирэх оны нийслэлийн төсөвт 17.3 тэрбум төгрөгийг баталсан байна.