УЛААНБУРХАНЫ эсрэг дархлаажуулалтад хамрагдсан эсэхийг ИНГЭЖ шалгаарай

Халдварт өвчин судлалын үндэсний төвөөс улаанбурхан өвчний нөхцөл байдлын талаар мэдээлэл өглөө. Өнөөдөр буюу 2025 оны зургаадугаар сарын 30-ний өдрийн байдлаар нийт улаанбурхан өвчний лабораториор батлагдсан тохиолдол 10.721,  эмнэлэгт хэвтэн эмчлүүлж байгаа 648, гэрээр 953, эдгэрсэн 9113, хавьтал 75.657, нас баралт 7, хүнд 45, нэн хүнд 1 хүн байна.

Та хүүхдээ улаанбурхан өвчний дархлаажуулалтад хамрагдсан эсэхийг дараах байдлаар шалгах боломжтой. 

• E-Mongolia апп-аас хүүхдийнхээ 9, 2 насанд вакцин хийлгэсэн эсэхийг харах
• Эх, хүүхдийн эрүүл мэндийн дэвтрээс (ягаан дэвтэр) шалгах
• Харьяа сум, өрхийн эрүүл мэндийн төвийн дархлаажуулалтын бүртгэлээс шалгуулах

Хэрэв таны хүүхэд улаанбурхан, гахай хавдар, улаануудын эсрэг (УГУ) товлолт вакцины 1, 2 -р тундаа бүрэн хамрагдаагүй бол нөхөн дархлаажуулалтад яаралтай хамруулна уу.

Вакцин нь хүүхдийг улаанбурхан өвчнөөс 97%-ийн үр дүнтэй хамгаалдаг. Хүүхдийнхээ дархлаажуулалтад хамрагдсан эсэхийг баталгаажуулах нь таны хамгийн чухал үүрэг юм.