Нүүрсний хулгайд сэрдэгдээд буй Д.Бат-Эрдэнэ, А.Адъяасүрэн нар юу хэлэв

Нүүрсний хулгайч нарыг ил болгох жагсаал найм дахь өдрөө төв талбайд үргэлжилж байна. Жагсаалаас үүдэлтэйгээр УИХ-ын гишүүн А.Адъяасүрэн, Д.Бат-Эрдэнэ нарыг нүүрсний хулгайтай холбоотой гэж МАН-ын хэд хэдэн гишүүд ил тодоор хэлсэн. Харин хулгайд сэрдэгдээд буй гишүүд ямар байр суурь илэрхийлэв? 

"Тавантолгой" ХК-ийн 19.77%-ийг "Ажнай корпораци" ХХК эзэмшдэг. Д.Бат-Эрдэнэ гишүүн "Ажнай корпораци" ХХК-д хувь эзэмшдэгээ АТГ-т тайлагнадаг хөрөнгө орлогын мэдүүлэгтээ тусгасаар ирсэн гэдгээ тайлбарладаг. 

Тэгвэл нүүрсний хулгайн хэрэгт нэр холбогдоод буй Д.Бат-Эрдэнэ өнгөрсөн пүрэв гарагийн УИХ-ын чуулганы үеэр дараах байр суурийг илэрхийлсэн юм. 

-УИХ-ЫН ГИШҮҮН Д.БАТ-ЭРДЭНЭ:

-Түр хорооны хугацааг сунгах хэрэгтэй. Энэ ажил нэлээн эр зориг шаардсан ажил. Ард түмний амьдрал хэцүү байна. 1072 хувьцааны ногдол ашиг хаана байна вэ. "Эрдэнэс Тавантолгой", "Тавантолгой" ХК гэдэг хоёр өөр компани. Манай эрх баригчид шүүхээр нотлогдоогүй байхад сөрөг хүчний А.Адъяасүрэн бид хоёрын нэрийг хаа хамаагүй хэлж байгаа нь хууль зөрчиж байгаа үйлдэл шүү. Үүнийг хувь хүнийхээ үүднээс сайн бодоорой. Оффтейк гэрээний асуудлыг нээлттэй ярилцаж байж жагсагчдад тодорхой мэдээлэл өгнө. "Чалко" компанийн давуу эрхтэй машины талаар яагаад ярихгүй байна. Орон нутгийн "Тавантолгой" ХК-д би тодорхой хувьцаа эзэмшдэг нь үнэн. Энэ компани энэ жил нэгж хувьцаандаа 2500-3000 төгрөг тараана. Энэ жишгээр 1072 хувьцааг тараах боломж байна.

Өнгөрөгч дөрөвдүгээр сард Ерөнхий сайд Л.Оюун-Эрдэнэ нүүрсний хулгайн талаар мэдээлэл өгч байсан ба уг мэдээллийн дараа А.Адъяасүрэн гишүүн ямар тайлбар өгч байсныг эргэн сануулж байна.

УИХ-ЫН ГИШҮҮН А.АДЬЯАСҮРЭН:

-Ерөнхий сайдын ярианаас олон тооны машинтай А.Адъяасүрэн гэж сонсож байсан. Энэ талаар өөрөөс нь тодруулж болох байх. Ямар мэдээлэл аваад, яагаад ийм зүйл ярьсныг мэдэхгүй байна. Би УИХ-д орохоосоо өмнө бизнес эрхлэгч, татвар төлөгч, ажил олгогч эмэгтэй байсан. Миний хувьд 1300 ажилтантай тээврийн компанийг хариуцаж ажилладаг байсан. Та нар мэдэж байгаа байх. Нүүрсний экспорт сайн гарч байхад 13-15 мянган жолооч эндээс ашиг орлого олж, ажилладаг байсан. Тэрнээс би нүүрсний лиценз, уурхай эзэмшдэггүй.   

Одоогийн байдлаар нэг ч автомашингүй. Намайг нэр дэвшихээс өмнө харлуулах зорилгоор нүүрстэй холбогдуулж байсан. Би шалгуулахад бэлэн. Би хуулийн байгууллагаас зугтаасан зүйл байхгүй. Харин ч би тээвэр хийж, олон мянган залууг ажлын байраар хангаж байсан бизнес эрхлэгч эмэгтэй.