Төсвийн орлого 10 их наяд төгрөгт хүрчээ

Энэ оны наймдугаар сарын байдлаар төсвийн  тэнцвэржүүлсэн орлого, тусламжийн хэмжээ 10 их наяд төгрөгт хүрчээ. Энэ нь өмнөх оны мөн үеэс 1.5 их наяд төгрөгөөр нэмэгдсэн үзүүлэлт юм. Төсвийн тэнцэл 899.7 тэрбум төгрөгийн алдагдалтай гарчээ.

Төсвийн орлого өмнөх оны мөн үеэс нэмэгдэхэд бусад татвар, төлбөр хураамжийн орлого 973 тэрбум төгрөгөөр өссөн нь голлох нөлөөг үзүүлсэн байна.

Сануулахад,  2022 оны нэгдсэн төсвийн тухай хууль хэрэгжиж эхэлснээсээ хойш дөрвөн сарын дотор ХОЁР УДАА тодотгол хийгдсэн.

УИХ-аас 2022 оны нэгдсэн төсвийг анх  батлахдаа:

• Орлогыг 15,771.7 тэрбум төгрөг буюу ДНБ-ий 33.7 хувьд

• Зарлагыг 18,158.8 тэрбум төгрөг буюу ДНБ-ий 38.8 хувьд байхаар тооцсон юм.

Харин 4 дүгээр сард хийсэн  тодотголоор:

• Төсвийн орлогыг 15,526.4 тэрбум төгрөг буюу ДНБ-ий 33.3 хувьд

• Зарлагыг 17,913.5 тэрбум төгрөг буюу ДНБ-ий 38.4 хувьтай тэнцүү байхаар тооцсон юм.