Өрх толгойлсон ээж, аавууд шаардлага хүргүүллээ

Өрх толгойлсон ээж, аавууд нэгдэж, төрийн гурван өндөрлөг болон УИХ-ын эмэгтэй гишүүдэд шаардлага хүргүүлж байна. Тэд Гэр бүлийн тухай хуульд өөрчлөлт оруулж, гэр бүл салалтын асуудлыг нарийвчилж өгөх, гэр бүл салгасан этгээдэд хариуцлага тооцох, хүүхдийн тэтгэмжийн хэмжээг нэмэгдүүлэх зэрэг шаардлага тавьж байгаа аж.

Иргэн:

-Хуульд эцэг эх эрх тэгш үүрэг хүлээнэ гэж заасан байдаг. Гэвч хүүхдээ аваад үлдэж байгаа нь ажл хөдөлмөр эрхлэх боломжгүй болдог. Цалингийн доод хэмжээгээр хүүхдийн тэтгэмж тогтоодог. Энэ бүхний ард хүүхдийн эрх зөрчигдөж байна. Хүүхдийн сэтгэл зүй болон бусад хэрэгцээг яаж нөхөх талаар хуульд заагаагүй. Иймд хууль эрх зүйн орчныг сайжруулаад өгөөч гэж хүсэж байгаа юм.

Иргэн:

-Өнөөдөр амьдрал хэцүү байна. Мөнгөний ханш унасан. 100 мянган төгрөгөөр өмнө нь тор дүүрэн юм авдаг байсан бол өнөөдөр хоёр дахин бага юм авч байна. Бид 1 сая төгрөгийн цалинтай ажил хийж үзмээр байна. Хөдөлмөр нийгмийн хамгааллын сайд аа та хөрсөн дээрээ бууж, амьдралтай шийдвэр гаргаад өгөөч ээ.

Иргэн н.Бүрэнтөгс дараах шаардлагыг уншиж танилцуулав.

Тэрбээр “Гэр бүлийн тухай хууль 1999 онд батлагдсанаас хойш 2 удаа өөрчлөлт орсон. Одоо байгаа хууль нь өрх толгойлсон ээж аавуудын эрхийг зөрчиж байна. Өнөөдрийн байдлаар өрх толгойлсон 80 мянган ээж, 20 мянган аав байна. Гэтэл хүүхдийн тэтгэлэг тогтоолгосон 4000 гаруй хүнээс 1000 гаруй хүн л тэтгэлгээ төлж байна. Эдийн засаг хямарч, бараа бүтээгдэхүүний мөнгө тэнгэрт хадсан тул тэтгэлгийн мөнгө хаанаа ч хүрэлцэхгүй байна.

Иймд Ерөнхийлөгч, Ерөнхий сайд, УИХ-ын дарга танаа.

• Орлого өндөртэй бол түүний 50 хувь, орлого багатай бол одоогийн хэрэгжиж байгаа амжиргааны баталгаажих түвшингээр нас харгалзахгүй тогтоох,
• Гэр бүл салахад нөлөөлсөн буруутанг тогтоож хариуцлага тооцдог болох,
• Хосууд гэрлэлтээ баталгаажуулаагүй ч хоёр талд амьдарч байсан хугацаандаа гэрлэлт цуцлуулсны дараа нөхөн төлбөрийг нөхөж олгож,
• Эхнэр болон нөхрийн аль нэг нь гадаад руу гарч ажиллахаар бол гэрлэлтийн гэрээ байгуулж, тус улсад очоод алга болсон тохиолдолд Элчин сайдын яамаар дамжуулан хүүхдийн тэтгэлэг гаргуулдаг болох,
• Гэр бүл салахад эцэг эхийн хариуцлагыг тодорхой болгох
• Өрх толгойлсон ээжүүдийн төлөөллийг Гэр бүлийн тухай хуульд нэмэлт өөрчлөлт оруулах ажлын хэсэг оруулахыг шаардаж, уг асуудлыг намрын чуулганы хугацаанд багтаан шийдвэрлэж өгөхийг хүсэв.