ЭХЭМҮТ ажилчдынхаа цалинг нэмж, 33 хүнд байрны урьдчилгаа өгчээ

Эрүүл мэндийн сайдаас өгсөн үүрэг чиглэлийн дагуу Эх, хүүхдийн эрүүл мэндийн үндэсний төвийн удирдлагууд ажилчдын үндсэн цалинг нэмэгдүүлж, 33 ажилтанд байрны урьдчилгаа төлбөр болох 30 сая төгрөгийг тус бүрт нь өгөх шийдвэр гаргажээ.

Эрүүл мэндийн сайд С.Энхболд тушаал гарган 2022 оны наймдугаар сарыг Эрүүл мэндийн салбарын ажилчдын нийгийн хамгааллыг дэмжих сар болгон зарласан. Энэ хүрээнд эмнэлэг бүр ажилчдынхаа цалинг боломжоороо нэмж, зарим ажилтанд гэр, байрны урьдчилгаа зэргийг олгож байна.

Энэ боломж бий болсон нь Эрүүл мэндийн салбарын шинэчлэлийн хүрээнд эмнэлгүүд гүйцэтгэлээр санхүүждэг болсонтой холбоотой. Гүйцэтгэл гэдэг нь эмнэлэг иргэнд эрүүл мэндийн чанартай үйлчилгээ үзүүлж, даатгалаас санхүүжилтээ авч орлого олох үйл явц юм. Үүний үр дүнд өрсөлдөөн сайжирч, иргэд чанартай үйлчилгээ авах боломж нээгдэж байна гэж тус салбарынхан үзэж байна.