Архи, тамхинаас “татгалзсан” дуучид анхны дуугаа бичүүлэх гэж студи хэсдэг байжээ

Хамтлагийнхаа 10 жилийн ойн баярыг тохиолдуулан “Нөлөөллөөс дээгүүрт” аян зохион байгуулж, охид залуусыг архи, тамхинаас татгалзахыг уриалж яваа “Татар” хамтлагийнхан өнгөрсөн хугацаанд юу үзэж, ямар бэрхшээл учирч байснаа дурсаж сууна. Хамгийн сонирхолтой нь, хип хоп урлагийг гадаадын нэгэн хамтлагаас олж мэдсэн нэг ангийн гурван хөвгүүн анхны дуугаа бичүүлэх гэж хөлөө эцтэл студи хэсч явжээ.

Халаасандаа мөнгөгүй, дуулах хүслээс өөрийг мэдэхгүй явсан “Татар”-чууд 1500 төгрөгийн үнэтэй CD авчихаад ихэд нандигнадаг байсан гэнэ. Олон дахин тоглуулсан кассет нь хуучирч муудаад, бичлэг нь чанарын шаардлага хангахаа больсон тул тэд ийнхүү CD сонгосон аж. “Тухайн үед 1500 төгрөг гэдэг үнэхээр их мөнгө шиг санагддаг байлаа. Тиймдээ ч ганц муу CD-гээ өөрөөсөө нуух шахам хайрлаж явсан шүү” хэмээн хөгжилдсөн суусан тус хамтлагийнхан энэ сарын 5-нд UB palace-ын Open Air-т тоглолтоо хийхээр төлөвлөсөн юм.