“Хайрын дууч” Э.Энх-Эрдэнэ хоёр чоно хөөгөөд хоосон хоцорчээ

Нийтийн дууны ханхүү, гүнж тодруулдаг болсон энэ цаг үед “Хайрын дууч”-аар өргөмжлөгдөөд буй дуучин Э.Энх-Эрдэнэ хөдөө орон нутгаар аялан тоглолт хийгээд саяхан хотод иржээ. “Амьдрах сайхан” нэртэй энэхүү тоглолтоо тэрбээр хэд хэдэн аймагт хийсэн бөгөөд хамгийн сүүлд Сэлэнгэ аймгаар 7 хоног аялсан гэнэ. Уран бүтээлч хүний хувиар шинэ дууныхаа санааг олж, байгалийн үзэсгэлэнт газруудаар зугаалсан дуучин Э.Энх-Эрдэнэ аян замын сонин ихтэй яваа бололтой.

Тухайлбал, дуучин залууг тоглолтоо хийн аялж явах зам зуурт нь хоёр ч удаа чоно дайралдсан бөгөөд төмөр хүлгээрээ араас нэлээд нэхсэн гэнэ. Гэвч угаасаа анд авд сүрхий гаршаагүй болоод ч тэр үү, аль эсвэл буу шийдэм авч яваагүй болохоор ч тэгсэн үү. Хоёр чонынхоо аль алиныг нь ч унагаж чадаагүй гэдгээ найз нөхөддөө сонирхуулсан бөгөөд “Хоёр дахиад чонотой тааралдсан гэхээр аз хийморьтой явсан хэрэг болох гээд байдаг. Гэтэл нэгийг нь ч алж чадаагүй болохоор юу гэлтэй билээ” хэмээн хөгжилдсөн аж.