Нийслэлийн авто зам борооны усанд ”сэлж” байна

Ойрын өдрүүдэд бороо ихээр орж байгаатай холбоотойгоор Нийслэлд хаа сайгүй ус шалбааг болж, хүн машин явах газаргүй болоод байгаа билээ. Учир нь Нийслэлийн автомашины зам дээр борооны ус зайлуулагч тэр бүр байдаггүйгээс ус ихээр тогтон, урсаж байна. Энэхүү борооны  ус машины дугуйг давж бүр хамар дээгүүр нь гарч ирэх энүүхэнд болжээ. Түүнчлэн явган иргэд зам хөндлөн гарахдаа ус туулан, үсэрч, харайж гарцгааж байгааг шооч нэгэн нь "уртын харайлт" хэмээн нэрийджээ. Энэ үнэндээ шоглож хэлсэн л болохоос биш бодит үнэн юм.

Бороо орох нь сайхан ч Нийслэлийн замын ус зайлуулагч хүрэлцдэггүйн улмаас борооны ус тунан шавар шавхай болдог нь иргэдийг бухимдуулж байна. Улаанбаатар хотын хэмжээнд авто замын гадаргуугийн ус зайлуулах 63.8 км далд инженерийн шугам сүлжээ ашиглагдаж байна. Хотын 47 гудамжинд байрлах энэхүү шугам нь замын гадаргуугийн усыг 1545 ширхэг ус хүлээн авах шүүрт худгаар дамжуулан авч зайлуулдаг. Улаанбаатар хотын төвлөрсөн хэсгийн авто замын 35 гаруй хувь нь буюу Хан-Уул дүүргээс бусад дүүргийн замууд гадаргуугийн ус зайлуулах далд шугам сүлжээтэй бөгөөд 1987 онд ЗХУ-ын “СОТ-2”-ийн барьсан нэг насос станц нийслэлийн хэмжээнд ажилладаг байна. Гэсэн ч энэхүү ус зайлуулах шугам дахин хэрэгтэйг энэ их борооны ус харуулж буй биз ээ.