Сүсэгтэн олны сунаж мөргөдөг вандан “нүцгэн” охидын сандал болж хувирчээ

Их, дээд сургуулийн төгсөлтийн баяр ар араасаа цуварсан эл өдрүүдэд Нийслэлийн төв талбай, Зайсан толгой, Гандантэгчилэн хийдээр “дүүрэн” цэцэг тэвэрсэн ганган охид, дэгжин залуус харагдах болж. Энгэрт нь гялалзах мөнгөн хонх, эзэмшсэн мэргэжлийг нь илтгэх дипломоос илүүтэй өмссөн зүүснээрээ гайхуулж яваа төгсөгчдийг харвал эгээтэй л загварын шоу аятай аашилдаг. Өндөр өсгийт дээрээ алхаж ч чадахгүй гуйвагнах, өмссөн дээлнийхээ хормойд тээглээд унах дөхсөн “моделиуд”-ыг хараад муухан хошин шог үзсэнээс ч илүү хөгжилдөх хүмүүс олон таардаг.

Тэгвэл төгсөлтийн баярын улиг болсон уламжлалын нэгд тооцогддог зүйл нь Гандантэгчилэн хийдээр зочлох. Үдшийн шоундаа яаран сэтгэл нь догдолсон төгсөгчид хийдийн хүрд эргүүлэн, хэдэн тагтааны дунд зургаа авахуулах гэж тэгтлээ хичээдэггүй нь нууц биш. Уйдсан тэднийг зугаацуулах зүйл угаасаа тэнд ховор болохоор арга ч үгүй биз. Гэтэл хагас нүцгэн шахуу хувцасласан охид хүүхнүүд сүсэгтэн олны сунаж мөргөдөг вандан дээр эрээ цээргүй гишгэж, элдэв янзаар суугаад зургаа татуулсан байх юм. Ялангуяа өвгөд хөгшдийн минь алгаа хавсран байж сүсэглэн мөргөсөн эл ванданг ийм “зориулалт”-аар ашигласандаа ичих ч үгүй яваа эдгээр охид зургаа өөрсдийн цахим хуудсанд байршуулжээ. Энэ маягаараа удвал Мэгжид Жанрайсиг дээр маань гарч суучихаад патиараа татуулж мэдэх л юм, арай дэндэж байгаа юм биш үү.