Хийлч Дээгий: Гадаад хүн хэдий ч, нөхөр маань таван цулын шөлөнд дуртай

Хоёр дахь амьдралаа зохиохдоо мөн л гадаад эрийн цайг чанахаар шийдсэн хийлч бүсгүй олны хэл амнаас огт зүрхшээдэггүй нэгэн. Тиймдээ ч хожуу учирсан хайрттайгаа хамт автобусаар зугаалж, томоохон арга хэмжээнд хөтлөлцөн ирдэг тэрбээр эмэгтэйчүүдэд зориулсан “W” клубын гишүүн болсон удаатай. Зовлон жаргалаа хуваалцаж, амьдралын нарийн ширийн асуудлыг хамтдаа шийдвэрлэн, бие биедээ зөвлөж тусалдаг гэх энэхүү клубын гишүүд ч Ч.Дэлгэрцэцэгийн дотны найзууд болжээ.

Тэгвэл хийлч бүсгүй саяхан гэр бүлийнхээ нэгэн нууцыг задалсан бөгөөд гадаад нөхөртөө таван цулын шөл хийж өгөх дуртай хэмээжээ. Тэрбээр энэ тухайгаа “Манай нөхөр хэдийгээр гадаад хүн боловч Монгол хоол, цагаан идээнд нугасгүй. Би амралтынхаа өдрөөр хүнсний захаар орж, таван цул худалдаж авдаг. Худалдагч нарт нь урьдчилаад захидаг учраас шууд л авна. Тэгээд нөхөртөө хонины бөөр, үхрийн элэг шарж өгнө. Бас ядарсан шинжтэй харагдвал таван цулын шөл хийж өгөхөөр тэр маань дуртай нь аргагүй иднэ дээ” гэж ярьсан бөгөөд тансаг амттан, элдэв төрлийн хоолноос илүүтэй энэ бүхэнд дасал болсон гэдгээ нуугаагүй аж. Үнэхээр ч амин дэм ихтэй, хүний биед ашиг тустай олон бодисыг агуулдаг гэх таван цулын шөлнөөс хэр баргийн хүн буцахгүй биз ээ.