“Extacy” хамтлагийн мисс Э.Дөлгөөн төгсөлтийн баяраа тэмдэглэлээ

“Making the band” шоунаас төрж, гавьяат жүжигчин Ж.Алтанцэцэгийн ивээлд багтсан “Extacy” хамтлагийнхан богино хугацаанд нэрд гарсан гэхэд хэтрүүлсэн болохгүй биз ээ. Анх найман гишүүнтэй байсан тус хамтлагийг “Рок попын хамгийн олон хүнтэй хамтлаг”-аар тодруулсан ч, продюссер Ж.Алтанцэцэг нь явцын дунд хатуухан шалгуураар шүүж тавыг нь авч үлдсэн түүхтэй. Өмссөн хувцаснаасаа авахуулаад дуу бичлэг, клипэнд нь хүртэл анхаарал тавьдаг эрхэм гавьяатын хүчинд өдий зэрэгтэй яваа “Extacy” хамтлагийн бүсгүйчүүд ч эхнээсээ сургууль соёлоо төгсөн уран бүтээлдээ шаргуу орж байгаа аж.

Тухайлбал, хамтлагийнхаа хамгийн царайлаг бас нуруулаг нь гэгдэж буй дуучин Э.Дөлгөөн саяхан мөнгөн хонхны баяраа тэмдэглэжээ. СУИС-ийн эстрад дуулаачийн ангийг амжилттай төгссөн тэрбээр хонхны баярынхаа нээлтэнд оролцож, ая дуугаа өргөх ёстой байж. Гэтэл яг тайзан дээр гарахын өмнөхөн даашинзных нь цахилгаан задарч, дуучин бүсгүйг сандаргасан ч найз нөхөд нь эвтэйхэн аргалаад асуудлыг тэр даруйд нь шийдсэн гэнэ.

Э.Дөлгөөний хувьд, бусад охид шиг элдэв янзын дээл хувцсаар гоёхыг эрхэмлэсэнгүй. Тэрбээр энгийн атлаа тун чамин хийцтэй, богино атлаа дэрэвгэр хормойтой торгомсог даашинз өмсч иржээ. Хамтлагийнх нь найз нөхөд ч түүнд баяр хүргэж, сургуулийн гадаа хэрэндээ л хөгжилдсөн аж. Улаан үс, улаан өндөр өсгийт, шаргал өнгийн даашинзаар гоёсон Э.Дөлгөөн ангийнхан дундаасаа тун ч содон харагдаж байсан шүү.