Ойрын өдрүүдэд говийн нутгаар 34 хэм хүрч хална

Баяр наадмын өдрүүдэд ихэнх нутгаар сэрүүхэн, бороо хуртай, цаг агаар таатай байсан бол ойрын өдрүүдэд нийт нутгаар харьцангуй тогтуун байх төлөвтэй байна.

Долдугаар сарын 17-ны Баасан гарагт Ховд, Говь-Алтай, Баянхонгор аймгийн говийн сумдаар өдөртөө 30-34 хэм хүрч хална. Харин 18-ны Бямба гарагт Говь-Алтай, Баянхонгорын говийн сумд, Өмнөговь, Дорноговь аймгийн нутаг болон Дундговийн зүүн өмнөд хэсгээр 32-34 хэмийн халуун байх төлөвтэй байна.

Долдугаар сарын 19-ний Ням гарагт Өмнөговь, Дорноговь, Сүхбаатар, Дорнод аймгийн нутгаар өдөртөө 28-30 хэм дулаан байна.

Хур тунадасны тухайд, 17-ны өдөр баруун болон хангайн бүс нутгаар, 18-ны өдөр хангай, төв, зүүн бүс болон говийн бүсийн зарим нутгаар түр зуурын дуу цахилгаантай бороо орно. Харин 19-ний өдөр Завхан, Архангай, Өвөрхангай, Дундговь аймгийн зарим сумын нутгаар мөн түр зуурын бороо орох төлөвтэй байна.

Улаанбаатар хотод долдугаар сарын 15-нд өдөртөө 24-26 хэм, 16-18-ны өдрүүдэд 22-24 хэм дулаан байна. Мөн 18-ны Бямба гарагт түр зуурын бороо орох магадлалтай байна.