Б.Энх-Оргил: Би Танг Кайтай тулалдахад бэлэн

Холимог тулааны “ONE” холбооны аварга Б.Энх-Оргил жин өгсөж 70.3 кг жингийн аварга Хятадын тулаанч Танг Кайтай тулалдахад бэлэн гэдгээ илэрхийлжээ.

Холимог тулааны “ONE” холбооны зохион байгуулагчид 2026 онд чухам хэнтэй тулалдахыг хүсэж, ямар амжилт гаргахыг зорьж байгааг асуухад Б.Энх-Оргил “Би дөрөвдүгээр сарын сүүл, эсвэл тавдугаар сард Танг Кайтай тулалдахад бэлэн” гэж хариулжээ. Тулааны спортоор дагнан бичдэг Sportskeeda цахим хуудасны мэдээлснээр Б.Энх-Оргил энэ жил өөрийн түрүүлсэн 65.8 кг жин болон 70.3 кг жинд хоёуланд нь тулалдаж аваргын бүсний эзэн болохыг зорьж байгаа аж.

БНХАУ-ын тулаанч Танг Кай нь 2022 оны наймдугаар сард “ONE” холбооны 70.3 кг жинд аваргын бүс зүүж, 2024 оны гуравдугаар сард аваргаа хамгаалснаас хойш бүсээ алдаагүй байна. Хамгийн сүүлд Танг Кай нь аваргын төлөө бус, ээлжит тулаанаа хийхэд Акбар Абдулаевт техникийн цохилтоор ялагдсан юм.

Холимог тулааны “ONE” холбооны аваргын бүсийн төлөө Б.Энх-Оргил 2025 оны 12-р сарын 6-ны өдөр Фабрисио Андрадетэй тулалдаж, 65.8 кг жингийн аварга болсон юм. Тэрээр Монгол Улсаас энэ холбоонд түрүүлсэн хоёр дахь тулаанч билээ. Түүний багш Ж.Нарантунгалаг 2014 онд “ONE” холбооны аварга болж байсан түүхтэй.

Эх сурвалж: Sportskeeda