“Ноорог”-ийн О.Уламсайханыг яллагдагчаар татжээ

“Ноорог” медиа агентлагийн гүйцэтгэх захирал О.Уламсайханыг Эрүүгийн хуулийн тусгай ангийн 10.4 дүгээр зүйлийн 1 дэх хэсэгт зааснаар Хүнийг амиа хорлох нөхцөл байдалд хүргэсэн гэх зүйл ангиар яллагдагчаар татаж, хэргийг шүүхэд шилжүүлжээ. Одоогоор шүүхийн урьдчилсан хэлэлцүүлгийн тов хараахан гараагүй байна.

Ташрамд дурдахад энэ хэргийн талаар Хууль зүй, дотоод хэргийн сайд асан О.Алтангэрэл 2025 оны гуравдугаар сард мэдээлж байлаа. Тухайн үед О.Алтангэрэл хэлэхдээ “Цагдаагийн байгууллагын 102 тусгай дугаарт 2024 оны есдүгээр сарын 6-нд “Гэртээ боомилж нас барсан байдалтай эмэгтэй байна” гэх дуудлага ирүүлснийг хүлээн авч Чингэлтэй дүүргийн цагдаагийн хэлтсээс 2024 оны есдүгээр сарын 24-ний өдөр хэрэг бүртгэлтийн хэрэг нээн мөрдөн шалгах ажиллагаа явуулж байна. Мөрдөн шалгах ажиллагааны явцад амь хохирогчийн хамтран амьдрагчид хоблогдуулан Эрүүгийн хуулийнтусгай ангийн 10.4 дүгээр зүйлийн 1 дэх хэсэгт зааснаар шалгаж байна” гэж байлаа.

Эрүүгийн хуулийн тусгай ангийн 10.4 дүгээр зүйлийн 1 дэх хэсэг нь 2-8 жилийн хорих ялтай байдаг байна.