Хоёр бөхөөс допинг илэрч, гарьд Б.Гончигдамбын сорьцыг нарийвчлан шинжилнэ

Улсын их баяр наадмын допингийн шинжилгээний хариуны талаар мэдээллийг өнөөдөр Баяр наадмыг зохион байгуулах хороо болон Үндэсний Допингийн эсрэг байгууллагын төлөөлөгчид хийлээ.

Мэдээлэлд дурдсанаар бол үндэсний их баяр наадмаар 4 болон түүнээс дээш давсан 32 бөх мөн сур харвааны тамирчид гээд нийтдээ 48 тамирчны сорьцыг Германы Дрезден хот дахь Дэлхийн допингийн эсрэг байгууллагын албан ёсны итгэмжлэгдсэн лабораторид шинжлүүлсэн байна.

Энэхүү 48 тамирчны 47-гийнх нь хариу өнөөдрийн байдлаар эцэслэн иржээ. Ирсэн хариунаас хоёр тамирчны сорьцоос допинг илэрсэн байна. Энэ хоёр тамирчны нэг нь улсын наадмаар 4 давсан Хэнтий аймгийн арслан Н.Баяржаргал. Нөгөө бөхийн нэрийг харин зарласангүй. Учир нь тухайн тамирчинд эхэлж танилцуулах ёстой юм байна. Тамирчинтай холбоо барьж чадахгүй байгаа учир энэ удаад нэрийг нь энэ удаад зарлах боломжгүй гэсэн юм.

Харин улсын баяр наадмаар дөрөв давсан улсын гарьд Б.Гончигдамбын сорьцыг Дрездений лабораториос шилжүүлж, Германы Кёльн хотын өөр нэгэн итгэжмлэгдсэн лабораторид нарийвчлан шинжлэх шаардлагатай болсон аж. Нарийвчилсан шинжилгээний хариу гартал ойролцоогоор сарын хугацаа шаардлагатай гэлээ.

Допингийн шинжилгээний хариуг удааж мэдээлж буй талаарх асуултад хариулахдаа “Өмнөх жилийнхээс нэг хоногоор хоцорч мэдээллээ. Учир нь хориглосон бодис илэрсэн тамирчинтай холбоо барьж, шинжилгээний хариуг танилцуулах гэсэн. Гэвч холбогдож чадаагүй учир нэрийг нь зарлалгүйгээр өнөөдөр мэдээлэл өгч байна” гэсэн утгатай хариулт өгөв.

Аймгийн арслан Н.Баяржаргалын хувьд энэ жилийн улсын баяр наадмаар нэгийн даваанд аймгийн начин Л.Бат-Амгалан, хоёрын даваанд улсын харцага Х.Гантулга, гурвын даваанд улсын арслан Х.Мөнхбаатарыг, дөрвийн даваанд улсан аварга С.Мөнхбатыг тус тус даваад тавын даваанд улсын арслан Б.Орхонбаярт унасан. 

Улсын гарьд Б.Гончигдамбын хувьд гурвын даваанд аймгийн арслан С.Занданхүүг, дөрвийн даваанд цэргийн арслан Б.Өлзийсайханыг даваад, тавын даваанд аймгийн арслан буюу улсын гарьд цол хүртсэн Н.Өсөхбаярт тахим өгсөн.