Домогт аварга Ж.Мөнхбатын хөшөөг нээж, Хакүхо М.Даваажаргал үг хэллээ

Монгол Улсын даяар дуурсагдах далай даян дархан аварга Жигжидийн Мөнхбатын хөшөөг Төв цэнгэлдэхийн ар талд байрлуулж, өнөөдөр албан ёсоор нээлээ.

Аварга аавынхаа хөшөөг ард түмэндээ дэлгэхээр АВАРГА хүү нь иржээ. Монгол хүн бүрийн сэтгэлийг догдлуулсан, нулимс мэлтэлзүүлсэн, хүндлэл сэргээсэн сайхан өдөр тохиож байна

Их аварга хүү нь Дархан аварга аавынхаа алдар нэр, дүр төрхийг Төв цэнгэлдэхийн дэргэд Гэрэлт хөшөөнд мөнхлөн үлдээлээ.

Олимпын мөнгөн медальт, Дэлхийн хүрэл медальт, улсын их баяр наадамд зургаан удаа түрүүлсэн домогт дархан аварга Жигжидийн Мөнхбатын хөшөөг нээх ёслолд гэргий Ө.Тамир, хүү Хакүхо М.Даваажаргал мөн дархан аварга Б.Бат-Эрдэнэ, А.Сүхбат, Г.Өсөхбаяр, Н.Батсуурь, улсын аварга С.Мөнхбат, Г.Эрхэмбаяр, Ч.Санжаадамба нарын зэрэг олон бөх оролцлоо.
 

Аатай, амтай, аргатай мэхтэй, тооцоотой, тоглоомтой, энгийн даруу хэрнээ эрхэмсэг аугаа аваргын хөшөөг үнэхээр бахдам сайхан урлажээ.

Хөшөөний нээлтийн үгийг дархан аваргын отгон хүү Хакүхо М.Даваажаргал хэлсэн юм.

Тэрбээр “Та бүхэндээ энэ өдрийн амгаланг эрье. Өнөөдөр аавынхаа алтан бөгжтэй, мөн 2006 онд аавынхаа надад хийлгэж өгсөн бүсээр би гангарч ирлээ. Энэ бүсийг аав минь намайг озэки цол хүртэхэд хийлгэж өгсөн, хоёр арслан ноцолдож дүрстэй юм. Хоёр эрдэнээрээ гоё аавынхаа хөшөөг нээлтэд очъё гэж бодсон юм... Аав минь байсан бол 85 насны сүүдэр тохиох байлаа. Өнөөдөр аавын минь сүлд өдөр...
 

Нэг л зангаараа, нэг л араншингаараа аав минь Монголын ард түмний хайртай хүү, хайртай аварга байсан. Одоо ч хайртай аварга нь хэвээр байгаа билээ. 25-хан насандаа дархан аварга цол хүртэж байлаа. Олимпод нэг ч ялагдалгүй мөнгөн медаль хүртэж, монгол хүн алтан медаль хүртэж болох юм байна гэдгийг ойлгуулж байлаа.
 

Ээжтэй минь 55 жил ханилан амьдрахдаа таван сайхан хүүхэдтэй болсон. Хайртай ээж минь одоо ч алт шиг сургаалиа хайрлан амьдарч байна. Ээждээ баярлалаа. Аавыг минь алдаршуулсан мөнхөлсөн хөшөөний нээлтэд хүрэлцэн ирсэн та бүхэнд баярлалаа. Аав минь бид таныхаа үргэлжлэл” хэмээн Хакүхо М.Даваажаргал хэлсэн юм.

Хөшөөний нээлтийн дараагаар Хакүхо М.Даваажаргал сэтгэгдлээсээ хуваалцахдаа:

“Байгалийн чулуугаар бүтээсэн энэ хөшөөг би уран бүтээл гэж хэлмээр байна. Хоёр жилийн өмнөөс энэ хөшөөг урлаж эхэлсэн. Эрийн гурван наадам байхгүй бол Монгол төр гэж байхгүй гэж аав минь хэлдэг байсан. Монгол түмэн, залуучууд маань ирж, харж, баярлаж, бахдаж байгаарай.

1968 оны олимпын мөнгөн медаль бол ялагдаагүй мөнгөн медаль байдаг. Тэртээ жил тэгж олимпын аварга болох боломж байна гэдгийг ойлгуулж байсан гэсэн үг. Аавынхаа энэ сайхан хөшөөний нээлтэд ирлээ.

Удахгүй би буцна. 25 жил ажилласан ажлаа хүлээлгэж өгсөн. Нэг хаалга хаагдахад нөгөө хаалга нээгддэг гэдэг. Би цаашдаа Монгол, Японы гүүр болно” хэмээн Хакүхо хэлсэн юм.