Хакүхо Холбооноос гарч буй шалтгаанаа дурдаж, ирээдүйн талаарх бодлоо дэлгэлээ

Өнөөдөр буюу зургаадугаар сарын 9-нд Мэргэжлийн сүмогийн түүхэнд 45 удаа түрүүлж, хосгүй дээд амжилтын эзэн болсон ёкозүна Хакүхо М.Даваажаргал хэвлэлийн бага хурал хийлгэлээ.

Энэхүү хурлаар Сүмогийн Холбооноос гарч буйгаа албан ёсоор зарласнаар дэвжээ толгойлж, шинэ чадалтай, чадварлаг сүмочид бэлдэх их хүсэл мөрөөдөлдөө хүрч чадахгүй болж байна. Тэрбээр үүний төлөө даяар дуурсагдах далай даян дархан аварга аварга  Жигжидийн Мөнхбат аавынхаа алдар суугаа мандуулж, ард олондоо хайрлагдсан Монгол улсын иргэншлээсээ татгалзаж, Японы иргэн болсон билээ.
 

Сар орчмын өмнө Монголын төрийн дээд шагнал “Алтан гадас” одонгоор энгэрээ мялаасан Исэгахама ояката буюу ёкозүна Асахифүжи хэвлэлийн бага хуралд оролцсон байна. Хакүхогийн дэвжээг хаасны дараагаар бүгдийг нь Исэгахама оякатагийн дэвжээ рүү шилжүүлсэн юм.

Исэгахама ояката Хакүхогийн дэргэд суугаад “Өнөөдөр Хакүхо албан ёсоор Холбооноос гарч буйг мэдэгдэж байна. Тэр маш олон амжилт, дээд амжилт тогтоосон. Түүн шиг хүн Холбоонд аль болох удаан хугацаанд үлдэн ажиллаж, сайн сүмочид бэлдэхийг харна гэж боддог байлаа.
 

Гэвч шийдвэрээ эргэлт буцалтгүйгээр гаргасан тул үлдээж чадсангүй. Тиймээс бүх сүмо сонирхогчдоос уучлалт хүсэж байна. Сүмод хайртай, сүмогоор бахархдгийг нь би сайн мэднэ. Сүмод өөрийн гэсэн хувь нэмэр оруулахыг хүсч байлаа. Би  ч үүнийг нь дэмжиж байсан юм. Харин одоо Холбооноос гадуур ажил эрхлэх хүслийг нь хүндэтгэн хүлээн авч байна. Ятгаж, үлдээж чадаагүйдээ харамсаж байна. Та бүхнээс Хакүхогийн шийдвэрийг хүлээн авч, дэмжихийг чин сэтгэлээсээ хүсэж байна” хэмээн Исэгахама мэдэгджээ.

Харин ёкозүна Хакүхо М.Даваажаргал мэдэгдэл хийхдээ “Энд хүрэлцэн ирсэн та бүхэнд энэ өдрийн мэнд хүргэе. Шахуу хуваарьтай ажилтай ч гэлээ өнөөдөр надтай хамт энд байгаад баярлалаа.
 

Сүүлийн 25 жилийн хугацаанд би сүмод дурлаж, сүмо ч намайг хайрлалаа. Энэ завшааныг ашиглаад Сүмогийн Холбооноос гарч, шинэ мөрөөдлийнхөө төлөө тэмүүлэх болсноо мэдэгдэж байна. Ахмад тамирчны хувиар Исэгахама дэвжээтэй холбоотой асуудал үүсгэсэндээ уучлалт хүсье.

Маш олон янзын үзэл бодол гарсан болохоор их ч догдолж байлаа. Гэхдээ өнөөгийн нөхцөл байдлыг бодож үзээд Сүмогийн Холбооноос гарч, сүмог гаднаас нь хөгжүүлэхэд чадах бүхнээ хийх ёстой гэж шийдлээ. Сүмочийн хувиар би сүмог Дэлхий дахинд хөгжүүлэх болно.

Шавь нараа бодсонгүй, хариуцлагагүй шийдвэр гаргалаа гэж хүмүүсийн ярьж буйг сонссон. Дахин хэлэхэд, шавь нараа гэсэн сэтгэл минь огт өөрчлөгдөөгүй шүү” хэмээн өгүүлжээ.

Тэрбээр олон жилийн турш өсвөрийн сүмочдын тэмцээнийг Хакүхогийн цом тэмцэнийг  зохион явуулж байгаа. Тэгвэл цаашид Дэлхий дахинд сүмог хөгжүүлэхэд анхаарч, Сүмогийн “Их дуулга” тэмцээнийг зохиох төлөвлөгөөтэй гэдгээ мөн мэдэгдлээ. “Сүмогоор дамжуулан Дэлхий дахинд итгэл найдвар, аз жаргал түгээхийг зорино” хэмээн хэлсэн байна.

Гэр бүлийнхэн шийдвэрийг нь хэрхэн хүлээж авсан талаар ярихдаа “Би аугаа түүхтэй Монголд төрсөн. Гайхамшигтай Японд оронд том амжилт гаргалаа. Гэр бүл болон эх орныхон маань миний шийдвэрийг санал нэгтэйгээр дэмжсэн” хэмээн мэдэгджээ.

Харин Сүмогийн Холбооноос гарах болсон шалтгаанынхаа талаар “Өнгөрсөн жилийн гуравдугаар сард дэвжээг шилжүүлсэн. Энэ жилийн дөрөвдүгээр сарын 1 гэхэд түүнээс хойш нэг жил өнгөрсөн.

Гуравдугаар сард Холбооны удирдлага дэвжээний талаар хэлэлцэхдээ хэзээ сэргээн нээх талаар тодорхой тогтоогүй. Энэ л гол шалтгаан болсон. Өнгөрсөн жил бид шавь нарынхаа хамт Ошима дэвжээнд шилжихийг хүссэн юм.

Гэвч Ошима дэвжээний ояката /Кёкүтэнхо Н.Цэвэгням/ бид хоёрыг монгол учраас боломжгүй гэсэн. Үүнээс болоод манай дэвжээний 9 сүмоч спортоо орхисон” гэжээ.

Ёкозүна Тэрүнофүжитэй таагүй харилцаатай улмаас удирдлага дор нь байхгүй гэсэндээ Холбооноос гарахаар шийдсэн гэх хэвлэлийн мэдээллийг үнэн эсэхийг асуухад “Энэ бол худлаа. Тэрүнофүжигийн удирдлага дор байхыг хүсээгүй гэдэг худал” хэмээн Исэгахама ояката өгүүлсэн байна.

Хэвлэлийн бага хурал дээр 43 минут орчим ярилцсаны эцэст түүнээс нэгэн сэтгүүлч ямар нэгэн зүйлд харамсаж буй эсэхийг нь асуухад “Үгүй ээ, юундаа харамсах вэ. 25 жилийг сүмод өнгөрүүлсэндээ талархая. Дараагийн ажлаа тодорхой болохоор дахиад та бүхэнд дуулгах болно. Хэрвээ Миягино дэвжээг сэргээн нээвэл би гаднаас нь туслах болно. Тэгэхээр хамтдаа л байна гэсэн үг. Сүмог олимпын төрөлд ороосой гэж би мөрөөддөг. Энэ мөрөөдлөө биелүүлэхийн тулд ажиллах болно. Баярлалаа” хэмээн өгүүлээд гарч оджээ.

Үйлд явдлын хураангуй:

2024. 02.21.

Миягино дэвжээний сүмоч Хокүсэйхо А.Даваанинж дэвжээнийхээ хоёр бөхийг дээрэлхэж, хүч хэрэглэсэн хэрэг үйлдсэн тул сүмогоос хөөгдөв.

2024.02.23.

Шавь Хокүсэйхог зөв хүмүүжүүлж чадаагүй ояката Миягино буюу ёкозүна Хакүход хариуцлага тооцож, оякатагийн зэрэглэлийг хоёроор буулгаж, гурван сарын хугацаатай цалинг нь 20 хувиар хасав.

2024.02.28.

Хакүхог Миягино дэвжээг удирдахыг хориглож, дэвжээг түүний шавь Ишиурагаар удирдуулахаар болов.

2024.03.28.

Миягино дэвжээг тодорхойгүй хугацаагаар хааж, дэвжээний 19 ояката болон сүмочийг Исэгахама дэвжээ рүү шилжүүлэв.

2024.05.29.

Миягино дэвжээнд харъяалагдаж байсан дөрвөн сүмоч спортоо орхив.

2025.06.02.

Сүмогийн Холбооноос гарах өргөдлөө өгөв.

2025.06.07.

Монголоос буцан ирж, “Хэвлэлийн бага хурал дээр бүхнийг ярина” гэв.

2025.06.09.

Хакүхо хэвлэлийн бага хурал зарлаж, Сүмогийн Холбооноос гарч буйгаа албан ёсоор зарлалаа.