“Бидний бахархал” төсөл Жаргалант суманд

Ертөнцийн эрдэмтэн мэргэд үндэстэн ястны төрөлх орон гэрээ авч явах арга ухааныг тусгаар тогтнолын арга ухаан хэмээн тайлжээ. Тийм ч учраас Ерөнхий боловсролын сургуулийн ахлах ангийн сурагчид, оюутан залууст улс орныхоо тусгаар тогтнолыг дээдлэх, эх орноо хайрлах, эх орон, тусгаар тогтнол, эх хэл, үндэсний түүх, соёлоороо болон монгол хүн болж төрснөөрөө бахархах итгэл, үнэмшлийг төрүүлэх, эрх чөлөөний үнэ цэн, учир холбогдлыг ухааруулан таниулах, эх оронч үзэл төлөвшүүлэх зорилгоор Монгол Улсын Ерөнхийлөгчийн Тамгын газраас “Бидний бахархал” төслийг хэрэгжүүлж байна.

Тус төслийн арга хэмжээ өнөөдөр Төв аймгийн Жаргалант суманд үргэжилж байгаа юм. Онцгой байдлын байгууллага, “Монгол хурандаа” нийгэмлэг, аймаг, сумдын Тамгын газар, Цэргийн хэлтсийн хамтран зохион байгуулж байгаа тус арга хэмжээнд тус сумын Ерөнхий боловсролын сургуулийн сурагчид, төрийн албан хаагчид болон ард иргэд хамрагдлаа.

Уулзалтын үеэр лекц, яриа таниулгаас гадна “Монгол хурандаа” нийгэмлэгийн уран бүтээлч хурандаа нар өөрсдийн уран бүтээлээ толилуулж, эх орон, тусгаар тогтнолын тунхаг бүтээлүүдээ хүргэсэн нь оролцогчдын талархлыг хүлээж байлаа гэж Онцгой байдлын ерөнхий газраас мэдээллээ.