Өөрийн охиныг өрөөлтэй нийлж алсан Т.Цогт ял авахуу, эргээд цагаатах уу?

Өөрийн дөрвөн настай охиноо хойд эхтэй нь нийлж амийг нь хөнөөсөн Т.Цогт, Г.Маралмаа нарын хэргийг шүүх, шүүх хурлын тов энэ сарын 17-нд Баянзүрх, Чингэлтэй, Сүхбаатар дүүргийн эрүүгийн хэргийн анхан шатны шүүхэд зарлагджээ. Дөрвөн настай охиныг байнга зодож, тарчлааж байсан хойд эх Г.Маралмаад шүүхээс 23 жилийн ял оноосон бол, төрсөн эцэг Т.Цогтыг удалгүй цагаатгасан.

Харин түүнийг суллагдсанаас хойш Г.Маралмаа нийслэлийн давж заалдах шүүхэд гомдол гаргаж, шүүхээр хэлэлцэж Т.Цогтыг эргүүлэн хориод байсан. Баянзүрх дүүргийн шүүхээс Т.Цогтод Эрүүгийн хуулийн тусгай ангийн 99 дүгээр зүйлийн 99.1 дэх хэсэгт зааснаар яллах дүгнэлт үйлдсэнийг Эрүүгийн хуулийн ерөнхий ангийн 72 дугаар зүйлийн 72.1.1 дэх хэсэгт зааснаар 99 дүгээр зүйлийн 99.1 дэх хэсэгт заасан эрүүгийн хариуцлагаас чөлөөлсөн байдаг.

 Ийнхүү Г.Маралмаа гомдол гаргаснаар УМБГ-ын Онц хүнд гэмт хэрэгтэй тэмцэх хэлтсээс энэ хэргийг дахин сэргээж шалгаж эхэлсэн. Г.Маралмаа энэ хэргийг үйлдсэнээс хойш багагүй хугацаанд торны цаана суусан бөгөөд улмаар энэ хугацаандаа өөрийн хүүхдийг төрүүлж амжсан юм. Түүний хувьд энэ хэргийг үйлдэж байх үедээ жирэмсэн байсан билээ. Харин түүний нөхөр талийгаач охины төрсөн аав гэгдэх Т.Цогт өөрийн охиноо бусадтай нийлж үгүй хийчхээд хэргийг би үйлдээгүй Г.Маралмаагаас бүх юм болсон гэж жирэмсэн эхнэр лүү гээ бухаж байсан удаатай.

Б.Тэнгис