“Монголын цахилгаан холбоо”-ны 1000 гаруй ажилчид гудамжинд гарах уу

Эдийн засгийн хүндрэлээс болж томоохон аж ахуй нэгжийн үйл ажиллагаа доголдоход хүрээд байгаа.Тухайлбал харилцаа холбооны цогц үйлчилгээ үзүүлдэг “Монголын цахилгаан холбоо” компанийн үйл ажиллагаа доголдож эхэлсэн байна. 1995 оны хувьчлалаар “Монголын Цахилгаан Холбоо” ХК байгуулагдахдаа төрийн өмчийн оролцоотой, гадаадын хөрөнгө оруулалттай хувьцаат компани болсон.

Тодруулбал тус компанийн 54.67 хувийг Монгол улсын Засгийн газар, 40.0 хувийг Бүгд найрамдах  Солонгос улсын Кореа Телеком корпораци, үлдсэн 5.33 хувийн хувьцааг дотоод, гадаадын иргэд, байгууллага, холбоочид эзэмшдэг. Гэтэл сүүлийн 20 жил дорвитой хөрөнгө оруулалт хийгдээгүйн улмаас компанийн цаашдын хувь заяа хэцүүхэн төрхтэй болжээ.

МЦХ компанид хөрөнгө оруулалт хийгдээгүйн улмаас гарсан хүндрэлийг МУЗГ, Кореа телеком компани гэсэн хоёр гол хөрөнгө оруулагчийг буруутгахаас өөр аргагүй болж байгаа юм.

Үйлчилгээ үзүүлэх техникийн үндсэн сүлжээ нь Монголын төрийн өмчит өөр компанийн мэдэлд байдгаас болж зах зээлээ өргөжүүлэх боломж хязгаарлагдмал, шинэ үеийн технологи, үйлчилгээг нэвтрүүлэх тусгай зөвшөөрлүүдийг олгодоггүй байдал нь Монгол талын хөрөнгө оруулагчийн гол буруу болж байгаа юм. Мөн шинэ технологийг нэвтрүүлэхэд шаардлагатай хөрөнгө оруулалтыг хийдэггүй байдал 19 жил үргэлжилсэн нь Солонгос талын хөрөнгө оруулагчидын хайхрамжгүй байдлаас болжээ.

Энэ хүнд нөхцөл байдлаас гарахын тулд Монголын Цахилгаан Холбоо компанийн Үйлдвэрчний Эвлэлийн Хороо, Мэдээлэл, харилцаа холбооны салбарын ахмадын нэгдсэн хороо, компанийн нийт ажилчид МУЗГ, Кореа телеком корпорацид авч хэрэгжүүлэх арга хэмжээний талаар санал шаардлага хүргүүлээд байгаа аж.

Монгол улсын Засгийн газар, Бүгд найрамдах  Солонгос улсын Кореа Телеком корпораци цаашид ямар нэгэн дорвитой алхам хийхгүй бол энэ компанид ажиллаж байгаа 1000 гаруй ажилчид ажилгүй болох дээрээ тулаад байна.Өнөөдрийн нөхцөл байдлыг өөрчлөхгүйгээр үргэлжлүүлбэл Монголын цахилгаан холбоо ХК 1-2 жилийн дараа үйл ажиллагаагаа хэвийн явуулах боломжгүй болж, дампуурлын ирмэгт тулах нь харагдаж байгаа юм.

Тус компани нь монгол улсын 21 аймаг, 180 гаруй сумдад суурин утас, интернэт, улс хоорондын яриа, кабелийн телевиз, лавлах үйлчилгээ зэрэг харилцаа холбооны цогц үйлчилгээг үзүүлж байгаа аж.

100 жилийн түүхтэй тус компанид  өнөөдрийн байдлаар 1000 гаруй ажиллагсад, тус компанид харъяалал бүхий 1000 гаруй ахмадууд, тэдний ард байгаа олон зуун гэр бүл идэх хоолноосоо салахад хүрээд байгаа аж. Үүнд МУЗГ, Солонгос улсын Кореа Телеком корпораци хариуцлага хүлээх үү?