22 жилийн ял сонссон Ц.Мөнхбаяр нарыг гадаа бас ордонд өмөөрцгөөв

“Гал үндэстэн” холбооны тэргүүн Ц.Мөнхбаяр тэргүүтэй хүмүүст анхан шатны шүүхээс оногдуулаад байгаа ялыг эсэргүүцэж буй иргэдийн төлөөлөл Монгол Улсын Ерөнхийлөгчид хандахаар болсноо өнөөдөр дуулгалаа. Иргэд Ц.Мөнхбаяр нарт оногдуулсан ялыг эргэн харж, өршөөл үзүүлэхийг хүссэн бичигт гарын үсгээ зурцгаан Ерөнхийлөгчид хүргүүлнэ гэж байна. Тэд “Төрийн албанаас олон тэрбумыг  хулгайлсан  хүмүүс хоёр жил гаруй хугацааны ял авчихаад, шоронд бус эмнэлэгт хэвтэж байгаад л гарч ирж байхад, эх орныхоо газар шороог хамгаалсан иргэд онц хэрцгийгээр хүний амь бүрэлгэсэн хүнээс их ял авч байна шүү дээ” хэмээн ярьж байна.

Тэгвэл иргэд ийнхүү мэдэгдэл хийсэнтэй зэрэгцэн төрийн ордонд улс төрийн намын дарга, нарийн бичгийн дарга нарын уулзалт болсон. Тус уулзалтад оролцсон намын дарга нарын олонх нь Ц.Мөнхбаяр нарын асуудлаар байр сууриа илэрхийлэхдээ тэдэнд өгсөн ял бол хууль зүйн талаасаа гэхээсээ улс төрийн захиалгат ял байлаа гэдгийг хэлцгээв. Тиймээс  үүнийг улс төрийн гаргалгаа хийж хуулийн зүйлчлэлийг өөрчлөх, улмаар Монгол Улсын Ерөнхийлөгч уучилж өршөөх хэрэгтэй болох байх гэдэг асуудал яригдсаныг МУНН-ын дарга Б.Батболд онцолсон байна. Мөн тэрбээр “Үүнийг та бид бүгдээрээ шаардаж байж ажил болгоно. Дээр нь шудрага ёс тогтоох зүгт нэг бодит алхам болно гэж үзэж байна.Үүнтэй зэрэгцээд үүргээ биелүүлээгүй сайд дарга нарт хариуцлага тооцох асуудлыг тавих нь бас шударга ёсонд нийцнэ” гэсэн байна.

Харин Эрх чөлөөг хэрэгжүүлэгч намын дарга Ш.Төмөрсүх Ц.Мөнбаярт оноосон ялыг эсэргүүцэж байгаагаа илэрхийлж, хэрвээ ялыг нь бууруулахгүй бол  зарим улс төрийн хүчнийхэн улстөржилт хийнэ гэдгийг хэлсэн. Тэгвэл МНН-ын гишүүн О.Бум-Ялагч Ц.Мөнхбаяр нарт оноосон ялыг эсэргүүцэж байгаагаа албан ёсоор илэрхийлэв.